Dáriger qaıtys bolǵanyn rastaǵan soń máıithanaǵa ornalastyrylǵan Polshanyń egde jastaǵy turǵyny sol jerde tirilip ketken. 

Varshavadan VVS tilshisi habarlaǵandaı, taıaýda Lúblın voevodstvasyndaǵy Lúbelskı araly qalasynda turatyn 91 jastaǵy Ianına Kolkevıchke tańǵy asyn ázirlep berý úshin Bogýmıla esimdi jıeni kelgen. 51 jastaǵy Bogýmıla tátesiniń bólmesine kirgende, onyń demsiz jatqanyn baıqaıdy. Tamyry soqpaı, kózi men aýzy jabyq jatqan. Bogýmıla birden dáriger shaqyryp, ol keıýananyń qaıtys bolǵanyn rastap, sáıkes kýálik jazyp beredi. VVS tilshisiniń aıtýynsha, qart anany jerleý rásimi eki kúnnen keıin ótýi kerek bolatyn. Týǵan-týystary jerleý rásimine daıyndalyp jatqanda, qaıtys bolǵan áıeldiń denesi jergilikti máıithanaǵa jetkiziledi. 11 saǵat tońazytqyshta jatqan Ianına Kolkevıchtiń óli denesi kenetten qozǵala bastaıdy, ony kórgen máıithana qyzmetkeri qatty shoshyp ketken. Ajalsyz qarıanyń týystary aıtqandaı, sol kúni tún ortasynda úıge qońyraý soǵylady. Bosaǵada turǵan máıithana qyzmetkeri Ianınanyń o dúnıeden qaıtyp kelgeni týraly habar jetkizipti. Ianına Kolkevıch úıine jetkizilgennen keıin, jıeni Bogýmılanyń áńgimeleýinshe, denesin kernegen sýyqtan mazasy ketip, bir kese shaı suraǵan eken. Panı Kolkevıchke óldi degen kýálik jazyp bergen 30 jyldan astam tájirıbesi bar dáriger onyń shyn máninde qaıtys bolǵanyna tolyq senimdi ekenin aıtyp, tirilip ketkenine qatty tańǵalyp otyr. Qazir, Lúbelskı aralynyń polıseıleri osy oqıǵaǵa qatysty tergeý amaldaryn júrgizip jatyr.

Bnews.kz