Serik Ahmetov asa iri kólemdegi búdjet qarajatyn jymqyrdy dep aıyptalyp otyr, - dep habarlaıdy Tengrinews.kz tilshisi Qaraǵandynyń Qazybek bı aýdany sotynyń baspasóz hatshysy Álıa Joshevaǵa silteme jasap.

"Qaraǵandy qalasy Qazybek bı aýdandyq sotynyń 2014 jyldyń 18 qarashasyndaǵy qaýlysymen aldyn ala tergeý organdary Qylmystyq kodekstiń 176-babynyń 4-bóligi, b tarmaǵynda qarastyrylatyn aýyr jemqorlyq qylmysyn (jaýapty memlekettik laýazymdaǵy adamnyń búdjet qarajatyn asa iri kólemde jymqyrýy) jasady dep aıyptaǵan Serik Ahmetovke eki aı merzimge - 2015 jyldyń 18 qańtaryna, 23.00-ge deıin úı qamaýyna alý túrinde bultartpaý sharasy sanksıalandy", - dedi Josheva.

Qaýly áli zańdyq kúshine ene qoıǵan joq, oǵan úsh kún ishinde shaǵym ne qarsylyq keltirýge bolady. Josheva bultartpaý sharasy retinde ne sebepti úı qamaýyna alý tańdalǵanyn aıtty.

"Myna derekter esepke alyndy: Serik Ahmetov buryn sottalmaǵan, turǵylyqty mekenjaıy bar, turǵylyqty mekenjaıy boıynsha oń minezdeme berilgen, úılengen, sot onyń densaýlyǵyn da eskerdi. Barlyq jaıtty taldaı kele sot bultartpaý sharasy retinde úı qamaýyna alýdy tańdaý durys bolady degen tujyrymǵa keldi. Ahmetovti túgel oqshaýlaý qajettiligi týǵan joq. Úı qamaýyna alý turǵylyqty mekenjaıy boıynsha iske asyrylady, ol Qaraǵandyda tirkeýge otyrǵan. Tergeý toby jetekshisiniń ózi prokýratýraǵa úı qamaýyna alý túrinde bultartpaý sharasyn sanksıalaý jóninde ótinish bildirdi, ıaǵnı bul - qylmystyq qýdalaý organdarynyń usynysy", - dedi baspasóz hatshysy.

Munyń aldynda Memlekettik qyzmeti isteri jáne sybaılas jemqorlyqqa qarsy is-qımyl agenttigi ókilderi tergelip jatqan isterdiń sheńberinde 1958 jyly týǵan Ahmetov Serik Nyǵmetulyna aıyp taǵylǵanyn jáne Qaraǵandynyń Qazybek bı aýdanynyń soty oǵan úı qamaýyna alý bultartpaý sharasyn sanksıalaǵanyn habarlaǵan bolatyn.