Búgin Parlament Senatynyń jalpy otyrysynda palata depýtattary «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Dıplomatıalyq ókildikterdiń ǵımarattaryn salý úshin jer ýchaskelerin ózara berý týraly kelisimdi ratıfıkasıalý týraly» QR Zańyn qabyldady.

Atalǵan kelisimge 2013 jyldyń 7 qyrkúıeginde Astana qalasynda qol qoıylǵan. Kelisimniń maqsaty eki el arasyndaǵy dostyq qarym-qatynastardy nyǵaıtý bolyp tabylady. Sonymen qatar, Qazaqstan Respýblıkasynyń Qytaı Halyq Respýblıkasyndaǵy, al QHR-dyń Qazaqstan Respýblıkasyndaǵy dıplomatıalyq ókildikteriniń bolýy men jumys isteýiniń tıisti jaǵdaılaryn qamtamasyz etý kózdeledi.

Bul rette kelisimge sáıkes, Qazaqstan Qytaıǵa Elshilik ǵımarattaryn salý úshin Astana qalasyndaǵy Táýelsizdik dańǵyly boıynan aýmaǵy 3 gektar jer ýchaskesin qyryq toǵyz jyl merzimge ýaqytsha jalǵa beriledi. Al Qytaı tarapynan Qazaqstanǵa bizdiń elimizdiń Elshisiniń rezıdensıasyn salý úshin Beıjiń qalasynyń 3-dıplomatıalyq aýdanynda alańy 0,2316 gektar jer ýchaskesin jáne QR Elshiliginiń ǵımaratyn salý úshin Beıjiń qalasynyń 4-dıplomatıalyq aýdanynan alańy bir gektar jer ýchaskesin qyryq toǵyz jylǵa jalǵa beriledi.

Toqtala ketetin jaıt, qazir Qazaqstan Elshiliginde 0,53 gektar aýmaqty quraıtyn jer ýchaskesi bar, osynyń barlyǵyn qosqanda Beıjiń qalasynda Qazaqstanǵa qarasty jalǵa beriletin jer ýchaskeleri 1,76 gektardy quraıtyn bolady.

Kelisimge sáıkes, jer ýchaskelerin paıdalanǵany úshin jalǵa alý aqysyn qospaǵanda, jer ýchaskelerindegi dıplomatıalyq ókildikterdiń ǵımarattary barlyq salyqtardan jáne mindetti tólemderden bosatylady.