Qazaqstan Respýblıkasy Din isteri jáne azamattyq qoǵam mınıstrligi «Daryn» memlekettik jastar syılyǵyn taǵaıyndaý boıynsha konkýrs jarıalady dep habarlaıdy Qamshy.kz aqparat agenttigi.
Bıylǵy jyldan bastap «Daryn» memlekettik jastar syılyǵy jemisti ǵylymı, shyǵarmashylyq, qoǵamdyq qyzmeti, sondaı-aq joǵary sporttyq jetistikteri úshin daryndy jastardy memlekettik qoldaý maqsatynda jyl saıyn taǵaıyndalady.
Nomınasıalar qataryna ǵylym, ádebıet, jýrnalısıka, sport, halyq shyǵarmashylyǵy, dızaın jáne beıneleý óneri, estrada, teatr jáne kıno, klasıkalyq mýzyka, qoǵamdyq qyzmet enedi.
Syılyq alýǵa úmitker retinde halyqaralyq jáne respýblıkalyq konkýrstardyń, festıválder men kórmelerdiń laýreattary, respýblıkalyq jáne halyqaralyq deńgeılerdegi sporttyq jarystardyń júldegerleri men jeńimpazdary bolyp tabylatyn 29 jasqa deıingi Qazaqstan Respýblıkasynyń azamattary, sondaı-aq qyzmeti ınovasıalyq bolyp tabylatyn jáne tıisti sala men tutastaı qoǵamdy damytýǵa yqpal etetin azamattar úmitker bolady.
Syılyq bir ýaqytta ár nomınasıa boıynsha ekiden artyq emes izdenýshige berilýi múmkin, bul jaǵdaıda onyń aqshalaı bóligi olardyń arasynda teń bólinedi. Syılyqty qaıta berýge jol berilmeıdi. Bir kandıdatýrany bir nomınasıadan artyq syılyq alýǵa usynýǵa bolmaıdy.
Syılyq alýǵa kandıdatýralar usynýdy ortalyq, jergilikti jáne ózge de memlekettik organdar, qoǵamdyq birlestikter men Qazaqstan Respýblıkasynyń zańnamasynda belgilengen tártippen tirkelgen ózge de zańdy tulǵalar júrgizedi.
Syılyq alǵan adamdarǵa «Daryn» memlekettik jastar syılyǵynyń laýreaty» ataǵy beriledi, dıplom, tósbelgi jáne aqshalaı syılyq tabys etiledi.
Syılyqtar saltanatty jaǵdaıda beriledi, marapattaý rásimi Qazaqstan Respýblıkasynyń Táýelsizdik kúnine oraılastyrylady.
Úmitkerlerdiń qujattary 2017 jyldyń 19 qyrkúıekke deıin Qazaqstan Respýblıkasy Din isteri jáne azamattyq qoǵam mınıstrligi Jastar saıasaty departamenti Astana qalasy, Máńgilik el, 8, Mınıstrlikter úıi (15-kireberis), 8 /7172/ 74 18 43, 8/7172/74-13-85, m.mazhitov@diakom.gov.kz, zh.zhunusova@diakom.gov.kz mekenjaıy boıynsha qabyldanady.
Aıta keteıik, Din isteri jáne azamattyq qoǵam mınıstrliginiń bastamasymen «Daryn» memlekettik jastar syılyǵy jyl saıyn taǵaıyndalady. Qazaqstan Respýblıkasynyń Úkimeti tıisti qaýlyǵa qol qoıdy.
Buǵan deıin «Daryn» memlekettik jastar syılyǵy nomınasıalar boıynsha eki jylda bir ret ǵana taǵaıyndalyp keldi.
