Elbasynyń «Bolashaqqa baǵdar: rýhanı jańǵyrý» baǵdarlamalyq maqalasynda aıtylǵan ıgi bastamalardyń oryndalýyn «Nur Otan» partıasy óz nazarynda ustaıdy. Bul týraly partıa Tóraǵasynyń Birinshi orynbasary Muhtar Qul-Muhammedtiń Qyzylorda oblysyna sapary barysynda belgili boldy.

Sapar barysynda Muhtar Qul-Muhammed oblys ákimi Qyrymbek Kósherbaevpen birge óńirdegi tarıhı oryndar – «Qorqyt ata» memorıaldy kesheninde boldy jáne ortaǵasyrlyq Syǵanaq qalasyn qaıta qalpyna keltirý jumystarymen tanysty. Mundaı tarıhı oryndardyń otanshyldyq pen ulttyq biregeılikti saqtap, nyǵaıtýda mańyzdy rólge ıe ekenin aıtqan «Nur Otan» partıasy Tóraǵasynyń Birinshi orynbasary Muhtar Qul-Muhammed: «Táýelsiz elimiz shırek ǵasyr ishinde qaryshtap damyp, Qazaqstan álem tanyǵan abyroıly memleketke aınalǵanda Elbasymyz rýhanı jańǵyrý baǵdarlamasyn usyndy. Onyń maqsaty jas urpaqty babalar tarıhynan taǵylym alǵan elin, jerin súıetin otanshyl rýhta tárbıeleý. Sondyqtan «Nur Otan» ult rýhanıatyn túletýge arnalǵan Elbasy tapsyrmasynyń elimizdiń barlyq óńirlerinde oıdaǵydaı júzege asýyn erekshe nazarda ustaıtyn bolady», – dedi.

Sonymen qatar, Muhtar Qul-Muhammed Syr óńirine jasaǵan sapary barysynda Kishi Araldy qaıta qalpyna keltirý jumystarymen de tanysty.

Qazirgideı jahandaný zamanynda ulttyq qundylyqty nasıhattap, tarıhı muralardy qaıta jańǵyrtýdyń mańyzy zor. Osy turǵydan kelgende elimizdegi basty saıası kúsh bolyp tabylatyn «Nur Otan» partıasy rýhanı jańǵyrý baǵdarlamasyn nazarda ustaýy kóńil qýantady.