Mindetti áleýmettik medısınalyq saqtandyrýdy engizý –  qorǵa túsken qarajatty medısınalyq kómektiń sapasyn jaqsartý úshin baǵyttaıtyn, sondaı-aq medısınalyq qyzmettiń naýqastarǵa qoljetimdi bolýy úshin búdjetti toltyratyn ekonomıkalyq reforma. Jambyl oblystyq onkologıalyq dıspanseriniń bas dárigeri, Jambyl oblystyq máslıhatynyń depýtaty Abaı Quralbekuly Nurjanov osylaı málim etti dep habarlaıdy Qamshy.kz aqparat agenttigi.

Elimizdiń densaýlyq saqtaý salasyna engizilip jatqan reformanyń, MÁMS júıesiniń jumysyn, densaýlyq saqtaý júıesindegi ózgeristerdi retteıtin zań kúshine enip (2017 jyldyń 30 maýsymynda qol qoıylǵan), Áleýmettik medısınalyq saqtandyrý qoryna 2017 jyldyń 1 shildesinen bastap el azamattary jarnalar aýdara bastady. Jambyl oblystyq onkologıalyq dıspanseriniń bas dárigeri, Jambyl oblystyq máslıhatynyń depýtaty Abaı Nurjanov MÁMS júıesi eń aldymen ekonomıkalyq reforma dep sanaıdy.

«Men densaýlyq saqtaý salasynda 30 jyldan astam jumys jasap, Keńes úkimetinen bastap Qazaqstan Respýblıkasynyń Táýelsizdik alǵan kezeńine deıingi densaýlyq salasynda bolyp jatqan reformalarǵa qatysyp kelemin. Bastalyp otyrǵan bul júıe – óte ýaqytyly qolǵa alynyp, bolashaqta óz jemisin beretin, densaýlyq  saqtaý salasynyń damýy úshin óte qajet júıe.

Bul júıe birinshiden, ekonomıkalyq reforma. Óıtkeni, medısınalyq saqtandyrý qoryna túsken qarajat medısınalyq kómektiń sapasyn jaqsartý úshin, sondaı-aq medısınalyq qyzmettiń naýqastarǵa qoljetimdi bolýy úshin búdjetti toltyrýy kerek. Zamanaýı jabdyqtar satyp alý úshin, joǵarǵy ádistemelik tehnologıalar engizý úshin, jańa ǵımarattar turǵyzý úshin bárine jetkilikti qarajat quıý qajet. Medısınalyq saqtandyrýdyń damýy qazirgi kezdegi densaýlyq saqtaý júıesindegi kemshilikterdi azaıtyp, júıesiz jasalyp júrgen isterdi jolǵa salady.

Ekinshiden, densaýlyq saqtaý salasynyń damýyna búkil qoǵam bolyp atsalysýymyz kerek. Sondyqtan, memleket, jumys berýshiler, jumyskerler, jeke kásipkerler óz salymdaryn qosýy qajet. Sonda ǵana kerekti qarajat jınalyp, bastaǵan isimiz júzege asady dep oılaımyn.

Úshinshiden, densaýlyq saqtaý salasynyń mamandary, dárigerler, meıirbıkeler, tehnıkalyq qyzmetkerler jalaqylary kóteriledi dep úmittenemiz. Óıtkeni, jalaqy joǵary bolǵan kezde ǵana adam bar oıyn shyn jumysqa salady.

Tórtinshiden, qoljetimdi medısınalyq kómek degenimiz –  ár naýqastyń qalaǵan memlekettik, jekemenshik medısınalyq ortalyqtarda qómek alýǵa quqyǵynyń bolýy, Qazaqstan Respýblıkasynyń aýmaǵyndaǵy qalaǵan medısınalyq mekemege qarala alýy. Bul kómektiń bári tegin bolady»,  –  deıdi Abaı Quralbekuly.

Tájirıbeli medısına salasynyń mamany reforma sátti júzege assa, syrqatqa shaldyqqan búldirshinder jan-jaqtan kómek izdep, halyqqa alaqan jaıýǵa májbúr bolmaıdy degen úmitin jetkizdi.

«Medısınalyq mindetti saqtandyrý elimizde tamyryn jaısa, biz esh utylmaımyz degen pikirdi qoldaımyn. Túrli syrqatqa shaldyqqan búldirshinder jan-jaqtan kómek izdep, halyqqa alaqan jaıýǵa májbúr bolmaıdy degen úmittemiz. 2018 jyldyń 1 qańtarynan bastap mindetti áleýmettik medısınalyq saqtandyrý júıesi naqty jumysyn bastaıdy.

Medısınalyq qyzmetker úshin bul júıe – óte jaýapty jáne aýqymdy bolyp tabylady. Densaýlyq – adam ómirindegi eń zor baılyq. Biraq adamdar oǵan syrqat boıyn meńdep, mazalaı bastaǵan kezde ǵana nazar aýdarady. Endi mindetti áleýmettik medısınalyq saqtandyrý júıesi boıynsha úsh jaqty jaýapkershilik –  elimizdiń ár turǵyny úshin azamattyń ózi, medısınalyq qyzmetker, memleket jaýapty bolmaq», –  dedi Abaı Quralbekuly.