Elordada «EKSPO-2017» halyqaralyq kórmesiniń eriktileri úshin merekelik tımbıldıng ótkizildi dep habarlaıdy Qamshy.kz aqparat agenttigi QazAqparatqa silteme jasap.
Úsh aılyq halyqaralyq kórmege eriktilerdiń «úsh býyny» da kelgen. Bulaı deıtinimiz, kórmege ár aı saıyn 500 eriktiden qatysady eken. Volonterlardyń kóbi kelesi aıǵa da qalyp, halyqaralyq sharaǵa atsalysyp jatady.
«Astana jastary» KMM-niń uıymdastyrýshy bóliminiń jetekshisi Shyńǵys Tileýlınniń aıtýynsha, búgingi shara jastardy dostastyryp, komandalyq biliktilikterin shyńdaýǵa baǵyttalǵan. Uıymdastyrýshylar shara barysynda shyǵarmashylyq jáne sporttyq saıystardy ótkizdi.
«Búgingi tımbıldıng qalanyń «EKSPO-2017» kórmesiniń 14 memlekettik mekemesinde jumys júrgizetin eriktiler úshin arnaıy uıymdastyrylyp otyr. Erteń ótetin «Jastar kúnine» oraı jas býyndy biriktiretin sharany qolǵa alýdy josparladyq. Volonterlar óz paıdalary úshin de jumys atqaryp jatyr. Máselen, medısınalyq kolejde oqıtyn stýdent dárigerlerge kómek kórsetip, tájirıbesin shyńdaýda. Eriktilerdiń eńbegin baǵalaýda munymen shektelip qalmaımyz», – deıdi Shyńǵys Tileýlın.
Eriktilermen birge búgingi sharaǵa astanalyq Altynshash Muqataeva da qatysyp otyr. Múmkindigi shekteýli jan bolsa da, Altynshash talabynan qaıtpaı, qala turǵyndary men qonaqtaryn ánimen qýantyp júr. Eriktilerdiń tımbıldıngine de Altynshash eki ánin daıarlap ákelgen eken.
«Astana qalasynyń ákimdiginen telefon shalyp, «Astana jastary» uıymynyń uıymdastyrýymen úsh kúndik «Jastar energıasy» lagerine qatysý týraly usynys kelip tústi. Qýana-qýana kelistim. Ár salanyń kóshbasshylary jınalǵan eken. Lagerde trenıńter, túrli sharalar boldy. Ánshi Marat Omarovtan sabaq aldyq. Men ózimniń tarapymnan án aıttym. Aldyńǵy aptalarda «Nur Otan» partıasynyń «Rýhy myqtylar» jobasyna qatystym. Bir sózben, shaqyrylǵan jerden qalmaýǵa tyrysamyn. «Shabyt» Qazaq óner ýnıversıtetiniń 2-shi kýrs stýdentimin», – deıdi Altynshash.
Altynshashtyń tamsandyra salǵan ánin jastar erekshe yqylaspen qabyl aldy. Sharaǵa sondaı-aq, Astana qalasy ákimdiginiń máslıhat depýtattary, belgili qoǵam qaıratkerler qatysty. Keshke deıin jalǵasatyn jastardyń tımbıldınginde belgili elordalyq ánshiler de ónerin pash etpek.
