Abaıdyń týǵanyna 172 jyl tolýyna oraı Qazaqstan Respýblıkasynyń Tótenshe jáne Ókiletti elshisi Imanǵalı Tasmaǵambetov jáne dıpmıssıa ókilderi Máskeýdiń qaq tórinde oryn tepken ǵulama aqyn Abaı eskertkishiniń aldyna baryp gúl shoqtaryn qoıdy dep jazady Qamshy.kz Reseıdegi Qazaqstan elshiligi aqparatyna súıenip.
Uly oıshyl tulǵany eske ala otyryp, qurmet kórsetken Imaǵalı Tasmaǵambetov, 2006 jyly osy eskertkishtiń ashylýyna oraı sóz sóılegen Qazaqstan Respýblıkasynyń Prezıdenti Nursultan Nazarbaevtyń sózin taǵy bir eske aldy: "Osy aıtýly oqıǵanyń naq osy jerde, ıaǵnı Abaı Qunanbaev shynaıy nıettesi bolǵan Reseı astanasynyń ortalyǵynda ótýiniń de ózindik máni bar. Abaı alǵashqy bolyp Pýshkınniń birtýar shyǵarmalaryn qazaq tiline aýdardy. Onyń shyǵarmashylyǵynyń arqasynda Lermontov, Góte, Baıron, Shıllerdiń jáne basqa da eýropalyq mádenıettiń kóptegen kórnekti ókilderiniń shyǵarmalary qazaq tilinde sóıledi. Endigi jerde Máskeýde Abaı eskertkishiniń bolýy – bul ótkenge qurmet kórsetý ǵana emes, eń áýeli – Qazaqstan men Reseıdi bir-birimen baılanystyratyn túgesilmes tarıhı tabystar men sáýleli úmitterdiń nyshany bolyp tabylady".
Esterińizge sala keteıik, Qazaqstan dıplomattary osy shara aıasynda eskertkish pen oǵan tıesili aýmaqta abattandyrý jumystaryn júrgizdi.
Máskeýdiń Chıstye prýdy jerinde oryn tepken Abaı eskertkishi Qazaqstannyń Reseıge jasaǵan syılyǵy bolyp tabylady. Onyń saltanatty ashylý rásimi Qazaqstan Respýblıkasynyń Prezıdenti Nursultan Nazarbaev pen Reseı Federasıasynyń Prezıdenti Vladımır Pýtınniń qatysýymen 2006 jyly 4 sáýirde ótken bolatyn.
Eskertkish qazaqstandyq músinshi M.Aınekov pen dızaıner T.Súleımenovtyń jobasy negizinde bir top músinshiler men sáýletshilerdiń kúshimen jasalyndy.
