Qyrǵyzstannyń Naryn oblysyndaǵy Emgekchıl aýylynyń turǵyndary aýyldaǵy búkil alkogól ónimderin joıdy. Bul bastamaǵa muryndyq bolǵan jas belsendiler osylaısha spırttik ishimdik saýdasyna toqtam salmaqshy. Bul týraly jergilikti jastar uıymynyń tóraǵasy Janybek Sopıev málimdedi, dep habarlaıdy Qamshy.kz aqparat agenttigi Centralasian.org saıtyna silteme jasaı otyryp.
Onyń sózinshe, aýyl turǵyndary eldi mekendegi barlyq spırttik ishimdikti satyp alý úshin 400 myń som jınaǵan, taǵy 100 myń somnyń ónimderin dúken ıeleriniń ózderi bergen. Tamyzdyń 11-i men 12-i kúnderi spırttik ishimdikterdi aýyl syrtyna shyǵaryp, túgeldeı joıǵan.
Turǵyndar kóptegen qaıǵyly oqıǵalarǵa alkogól sebep bolatynyn aıtady. Buǵan deıin oblystyq qazıat Naryn oblysyndaǵy bes aýylda spırttik ishimdik satýdy birjolata toqtatqany týraly habarlaǵan.
Dál osyndaı jaǵdaı jaqynda Osh oblysyndaǵy Japalaq aýylynda bolǵan edi. Jergilikti turǵyndar aýyldaǵy búkil spırttik ishimdik ataýlyny satyp alyp, túgeldeı búldozermen taptap, joıǵan.
Ótken aptada Batken oblysynda ımamdar jergilikti dúkenderdi aralap, spırttik ishimdik saýdasynan bas tartýǵa shaqyrǵan. Budan keıin Qyrǵyzstan musylmandary dinı basqarmasynyń bas múftıi Maqsat qajy Toktomýshov dinı basqarma "alkogól saýdasyna májbúrlep tyıym salýshylardy qoldamaıtyny" týraly málimdegen.
