Aqtaýda Ortalyq ıpodrom salynady. Onda «Adaı» jylqysyn suryptaý, asyldandyrý ortalyǵy jasaqtalmaq. At báıgesinen TMD Kýbogy men halyqaralyq jarystardyń júldesin alatyn qazaqy tuqymdy asyldandyrý Mańǵystaý oblysynda jolǵa qoıylýda dep habarlaıdy Qamshy.kz aqparat agenttigi. 

«Adaı» jylqysy 2014 jyly Fransıada ótken búkilálemdik at sporttary saıysyna qatysyp, eki júzden astam memlekettiń ishinde úzdik ondyqqa kirgen. 120-160 shaqyrymǵa shabatyn jylqy Mańǵystaý elinde ǵana meken etedi. Bul týraly Ortalyq komýnıkasıalar qyzmetinde ótken Mańǵystaýdyń Astanadaǵy mádenıet kúnderine arnalǵan baspasóz konferensıada belgili boldy. 

– Ústimizdegi jyly Elbasynyń baǵdarlamasyna oraı Ulttyq sport túrleriniń ortalyǵy ashylady. Negizgi maqsat – Adaı jylqysyn nasıhattaý. At jarysy olımpıadalyq sport túri ekenin eskere otyryp, «Adaı» jylqysyn tuqymdastyrýǵa kúsh salamyz, – dedi Mańǵystaý oblysynyń dene shynyqtyrý jáne sport basqarmasynyń basshysy Bekbolat Baıjanov.

Baspasóz jıynda 15-18 tamyz kúnderi ótetin mádenı sharalardyń kestesi tanystyryldy. Tórt kúnge sozylatyn sharaǵa Mańǵystaý jeriniń 567 ónerpazynyń qatysýymen Astanada 40-qa jýyq shara josparlanǵan.