«Bárine birdeı unaıdy dep kútýge bolmaıdy. Bizde ondaı ıllúzıa  joq. Biz qoǵamnyń barlyq jigi men toptarynyń múddelerin eskere otyryp, memlekettiń múddesin negizge alamyz. Eń bastysy – memleket múddesin qatań saqtaý. Árıne, bárine unaý múmkin emes».  Elimizdiń Din isteri jáne azamattyq qoǵam mınıstri Nurlan Ermekbaev Sayasat.org saıtyna bergen suhbatynda din salasyndaǵy zańnamaǵa engiziletin túzetýlerdi qoǵamnyń qalaı qabyldaýy múmkin degen saýalǵa osylaı jaýap berdi dep habarlaıdy Qamshy.kz aqparat agenttigi QR Din isteri jáne azamattyq qoǵam mınıstrligine silteme jasap.

Aǵymdaǵy jyldyń 20 maýsymy kúni Memleket basshysy óz jarlyǵymen Qazaqstan Respýblıkasynyń din salasyndaǵy memlekettik saıasatynyń 2017 – 2020 jyldarǵa arnalǵan tujyrymdamasyn bekitti. Atalǵan qujatty Din isteri jáne azamattyq qoǵam mınıstrligi ázirlegen bolatyn.

Mınıstrdiń sózinshe, tujyrymdama zań jobalaý úshin saıası-teorıalyq negizderdi qurý úshin qajet. Tujyrymdamanyń negizinde zańnamaǵa ózgerister men tolyqtyrýlar toptamasyn ázirleý boıynsha jumys júrgizilýde. Eger ony talqylaý oń nátıje beretin bolsa, 13 zań men 4 kodekske shamamen 60 túzetý men tolyqtyrýlar engiziletin bolady.

Sondaı-aq, vedomstva basshysy: «Biz zańnamany ázirleý kezinde qoǵamnyń pikirine júginemiz jáne túzetýlerdi qoǵamnyń barlyq ókilderimen ashyq túrde talqylaý qaǵıdasyn ustanamyz. Osy zań jobasyn daıyndaý kezinde joba sarapshylardyń, dinı birlestik ókilderiniń, ÚEU ókilderiniń kóptegen talqylaýynan ótti. Barlyq pikirler men usynystar eskerilip, aýqymdy jáne kóp eńbekti talap etetin jumys júrgizildi. Bul jumys áli de jalǵasatyn bolady. Qarasha-jeltoqsan aılarynda ony Májiliske joldaýdy josparlap otyrmyz», – dep atap ótti mınıstr Nurlan Ermekbaev.