QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysy barysynda QR ulttyq ekonomıka mınıstri Tımýr Súleımenov 2018-2020 jyldarǵa arnalǵan «Qazaqstannyń ulttyq eksporttyq strategıasyn» júzege asyrý boıynsha sharalar josparyn usyndy. Bul týraly qamshy.kz aqparat agenttigi Premer-mınıstrdiń baspasóz qyzmetine silteme jasap habarlaıdy.

T. Súleımenov «Qazaqstannyń ulttyq eksporttyq strategıasy» Memleket basshysynyń «Qazaqstannyń  úshinshi jańǵyrýy: jahandyq básekege qabilettilik» atty Joldaýyndaǵy tapsyrmalaryn oryndaý úshin ázirlengenin, 2015 jylmen salystyrǵanda, 2025 jylǵa qaraı shıkizattyq emes taýarlar eksportynyń kólemin eki esege arttyrýǵa baǵyttalǵanyn túsindirdi. Óz kezeginde, Úkimet ázirlegen ony júzege asyrý boıynsha sharalar jospary 2015 jylǵy kórsetkishpen salystyrǵanda, 2020 jylǵa qaraı shıkizattyq emes eksportty bir jarym esege arttyrýǵa múmkindik beredi.  

Búginde qazaqstandyq ónim álemniń 117 eline eksporttalady. Ótken jyly Qazaqstan álemdik eksport kóleminen 0,23% úlesimen 204 eldiń ishinde 52-shi orynǵa ıe boldy.

Qazaqstannyń eksporty negizinen shıkizattyq ónimder, sonymen qatar óńdelýi tómen shıkizattyq emes ónimder quraıdy. Sońǵy 10 jyl ishinde qyzmet kórsetý eksporty eki esege derlik artyp, 2016 jyly $6,3 mlrd. qurady.  

Shıkizattyq emes eksport kóleminiń ósimin qamtamasyz etý úshin baǵdarlamada birqatar mindetterdi keshendi sheshý usynylǵan, onyń ishinde eksportshylardy qoldaýdyń ınstıtýttyq negizderin jetildirý bar.

Atap aıtqanda, «QazaqEksport» UK-nyń eksportty qoldaý jáne damytý boıynsha biryńǵaı operatory mártebesin zań júzinde bekitý usynylady, ulttyq kompanıa elimizdiń barlyq óńirlerindegi jáne shetelderdegi ókildikteri arqyly «bir tereze» qaǵıdaty boıynsha jumys isteıtin bolady.

Budan basqa, perspektıvaly ótkizý naryǵyn bólýmen taýarlar men kórsetiletin qyzmetter boıynsha «eksporttyq sebet» aıqyndalǵan. Oǵan jeti saladan 116 taýar endi. Eksport turǵysynan, perspektıvaly qyzmetterge kólik, týrısik, medısınalyq, bilim berý, ǵarysh, sonymen qatar qarjylyq jáne iskerlik qyzmetter jatady.

Perspektıvaly ótkizý naryqtary retinde 27 el anyqtaldy, olar shartty túrde Qazaqstan úshin eksporttyq múdde dárejesi boıynsha basymdyqty, joǵary jáne ortasha, jáne uzaqmerzimdi perspektıvada qyzyǵýshylyq týdyratyn elder retinde bólingen.  

Sóz sońynda mınıstr baǵdarlamany júzege asyrý boıynsha ázirlengen sharalar jospary 2020 jylǵa qaraı shıkizattyq emes eksport kólemin bir jarym esege arttyrý boıynsha qoıylǵan maqsatqa qol jetkizý dárejesin baǵalaýǵa múmkindik beretin maqsatty kórsetkishter men nátıjeler kórsetkishterin qamtıtynyn atap ótti.