2017 jyldyń 2-8 qyrkúıek aralyǵynda Astanada Qazaqstan Respýblıkasy Mádenıet jáne sport mınıstrliginiń qoldaýymen  halyqaralyq EKSPO-2017 kórmesiniń mádenı baǵdarlamasy aıasynda Qazaqstan Teatrlary asosıasıasy jas rejıserlardyń Qaırat Súgirbekov atyndaǵy I Respýblıkalyq forým-festıvalin ótkizedi dep habarlaıdy Qamshy.kz aqparat agenttigi.

Jas rejıserlar – qazaq teatrynyń erteńi. Ulttyq sahna óneriniń qulashyn keń jaıyp, álem aldynda tanylýy da jas býynnyń izdenisteri men umtylystarynan bastaý alady. Atalmysh óner merekesinde jas rejıserlardyń, sheberlik saǵattarynan ótip, rýhanı sabaq alyp, dúnıetanymdarynyń ózgerip, ónerde ózgeshe jol, baǵyt baǵdar alary sózsiz.

Forým-festıval jas teatr rejıserlarynyń shyǵarmashylyǵyna jol ashyp, qazaq rejıssýrasyn jańa esimdermen tolyqtyrýdy, sonymen qatar jas jáne tanymal teatr rejıserlaryna pikirtalastar, leksıalar, sheberlik-synyptary, semınarlar baǵdarlamalary arqyly bilim jáne komýnıkasıa alańyn jasap, otandyq rejıssýra óneriniń órisin keńeıtýge múmkindik týǵyzady.

Sondaı-aq, qazaqtyń jańashyl teatr rejıseri Qaırat Súgirbekovtiń esimin este qaldyrý maqsatynda uıymdastyrylyp otyr. Sharanyń basty maqsaty talantty jas rejıserlar shyǵarmashylyǵyna qoǵam men qalyń kópshiliktiń nazaryn  aýdarý bolyp tabylady.

Forým-festıvalge respýblıkamyzdaǵy 20-40 jas aralyǵyndaǵy jas rejıserlar Elik Nursultan, Dáýren Sergazın, Dına Qunanbaıqyzy, Rústem Janyamanov, Bolat Abdrahmanov, Farhad Moldaǵalıev, Juldyzbek Jumanbaı, Gúlnáz Qamysbaeva, Meıram Habıbýllın, Aıdyn Salbanovtar qatysady.

Alty kún boıy Astana qalasynyń qonaqtary men turǵyndary forým-festıval barysynda M. Áýezov atyndaǵy Qazaq Memlekettik akademıalyq drama teatry, Ǵ.Músirepov atyndaǵy balalar men jasóspirimder teatry, Respýblıkalyq akademıalyq nemis drama teatry, Astana Jastar teatry, Aqtóbe oblystyq Alaqaı teatry, S.Muqanov atyndaǵy Soltústik Qazaqstan oblystyq qazaq drama teatry, Shyǵys Qazaqstan oblystyq Jastar teatry, A.I. teatry, J.Shanın atyndaǵy oblystyq akademıalyq qazaq drama teatry, Almaty qalasy memlekettik qýyrshaq teatry, Atyraý oblystyq Mahambet Ótemisuly atyndaǵy qazaq drama teatrlarynyń qoıylymdaryn tamashalaı alady.

Jastyqtyń jalyny, qıaldyń qanaty, táýekeldiń tuńǵıyǵy synǵa túsetin atalmysh forým-festıvaldiń arqalaǵan júgi jeńil emes. Astanadaǵy alty kún – bolashaq rejıssýra alyptarynyń qalyptasýyna sebepker bolady degen senimdemiz.