Elimizdiń ártisteri Bodrýmdaǵy Halyqaralyq balet festıvaline alǵash ret qatysty dep jazady Qamshy.kz aqparat agenttigi.

QR Mádenıet jáne sport mınıstrliginiń habarlaýynsha, Bodrýmdaǵy XV Halyqaralyq balet festıvalindegi «Astana Balet» teatrynyń debúti sátti ótkeni sonshalyq, teatr ujymyn Túrkıada kelesi jyly ótetin festıválge de shaqyrdy.

Bodrýmdaǵy festıvál Túrkıadaǵy tuńǵysh ári jalǵyz ǵana balet festıvali. Jyl saıyn jazda ótetin festıválge álemniń úzdik trýppalary men balet juldyzdary shaqyrylady. Sol sebepti bolar, Túrkıanyń ózinde de bul festıváldiń orny erekshe. Kóptegen teatr qaıratkerleri men balet súıer qaýym Bodrýmdaǵy demalysyn festıvál óter merzimge yńǵaılastyrýǵa beıim.

Festıváldiń kórkemdik jetekshisi Saadet Zeınep Sýnal Bodrýmdaǵy balet festıvali byltyrdan beri Halyqaralyq festıválder men baıqaýlar federasıasyna engenin maqtanyshpen jetkizdi.

«Bizdiń sahnada óziniń úzdik qoıylymdaryn túrik teatrlary ǵana kórsetip qoımaı, Koreıa men Amerıkanyń áıgili ujymdary, «LOS VIVANCOS» atty tanymal ıspan ujymy, Krasnoıar Opera jáne balet teatrynyń trýppasy, Natalá Kasatkına men Vladımır Vasılóv jetekshilik etetin Memlekettik akademıalyq klasıkalyq balet teatry ónerin kórsetip, Borıs Eıfmannyń teatry «Don Kıhot» spektaklin qoıdy. Biz dúnıe júzindegi tanymal, áıgili balet ujymdaryn shaqyrýǵa tyrysamyz, baǵdarlamamyzdyń da qyzyqty ári alýan túrli bolýyna kúsh salamyz. Bıylǵy baǵdarlama da osyǵan mysal bola alady».

«Astana Balet» teatry kórermenderge qyzyqty baǵdarlamany tartý etti. Kórermen qaýym horeograf Rıkardo Amarante qoıǵan teatr repertýaryndaǵy «GAIA» jáne «A Fuego Lento» atty bir aktili baletterin tamashalaı aldy. «Osy festıválge qatysyp, tamasha óner kórsetkenimizge qýanyshtymyn. Ártisterdiń bıi, kórermenniń qoshemeti – osynyń bári kóńilden shyqty. Festıváldi uıymdastyrýshylar da, kórermen qaýym da ártisterimizdiń sezimtal, sulý ári tehnıkasynyń da myqty ekenin atap ótti. Biz úshin bul qıyn qoıylym bolǵanymen, «Astana Balet» teatrynyń ártisteri bul dúnıeni daryndylyǵy men eńbekqorlyǵynyń arqasynda alyp shyqty. Olar naǵyz balet saltanatyn pash etti», – dedi festıváldegi qoıylymnan keıin Rıkardo Amarante.

«Astana Balet» teatrynyń Áýlıe Petr qamalynyń amfıteatrynda kórsetken «GAIA» jáne «A Fuego Lento» atty qos spektákldiń plasıkalyq, mýzykalyq jáne emosıalyq turǵydan aıyrmashylyǵy jer men kókteı. «GAIA» – sý, jer, ot, aýa jáne orman sekildi ózara áreket etip, birin-biri tolyqtyryp otyratyn bes elementten quralǵan Jer shary jaıly sezimtal ári jan-tánińdi baýrap alatyn horeografıalyq ápsana.

«A Fuego Lento» – yntyq sezim, býyrqanǵan qushtarlyq, alaýlaǵan emosıaǵa toly qoıylym. Qos balettiń alýan-túrliligine qaramastan, «Astana Balet» teatrynyń oryndaýynda ekeýi de úılesimdi kórindi. Jer-Ananyń minsiz sulýlyǵy men óshpes mahabbat jaıly qos ápsanany kórermen qaýym zor qoshemetpen qarsy aldy. 

Festıválge arnaıy kelgen Túrksoı Bas hatshysynyń orynbasary Fyrat Pýrtash, bıyl Túrkıa men Qazaqstan arasyndaǵy dıplomatıalyq qarym-qatynastyń ornaǵanyna 25 jyl tolǵanyn atap ótti.

Pýrtash myrzanyń pikirinshe, Qazaqstan ken baılyǵymen ǵana áıgili emes, óziniń syrtqy saıasaty ári Qazaqstan Prezıdenti Nursultan Nazarbaevtyń qyzyqty maqalalary men baıandamalarynyń arqasynda da álemge tanymal. Qazaqstan men Túrkıa arasyndaǵy yntymaqtastyq túrli salada bekı tústi. Al, «Astana Balet» teatrynyń sapary – Qazaqstannyń mádenıetine degen zor qyzyǵýshylyqtyń da baryn kórsetip otyr. Túbi bir túrki elderiniń yntymaqtastyǵynyń kilti de osynda.

Halyqaralyq balet festıvaliniń uıymdastyrýshylary «Astana Balet» teatry ártisteriniń sheberligi festıvál baǵdarlamasyna kórik bergenin atap ótip, Qazaqstannyń jas ta bolsa, el aýzyna ilingen jas ujymynyń Bodrým festıvaline qatysýyna túrtki bolǵan Túrksoı Halyqaralyq túrki mádenıeti uıymyna iltıpatyn bildirdi.

Bodrýmdaǵy XV Halyqaralyq balet festıvalinde Ankara men Ystambul opera jáne balet teatrlary; dástúrli jáne zamanaýı bılerdi tanymal horeograf Lıst Alonsonyń qoıylymynda kórsetken kýbalyq trýppa óner kórsetkenin atap aıtý kerek. Kórermen qaýym «LOS VIVANCOS» bı shoýyn; Úlken teatr men «La Skala» Mılan teatrynyń prıma-balerınasy Svetlana Zaharovanyń «Amore» baǵdarlamasyn tamashalaı aldy.