Hıromant mamandar saýsaqty pishimine qaraı úshkir, tórtburyshty, doǵal, salaly, qysqa dep beske bóledi dep jazady Qamshy.kz aqparat agenttigi.
Úshkir saýsaq: Hıronomıa ilimi boıynsha mundaı saýsaq isker, qyzýqandy, ásershil, sheshemtal adamǵa bitedi. Sondaı-aq hıronom mamandar úshkir saýsaq ıeleri ne nársege de shydamsyz, turaqsyz, qubylmaly, jurttyń aıtqanyna ergish, sengish keledi dep esepteıdi. Keıbiriniń tipti jeńiltek, qatygez bolýy da yqtımal ekenin eskertedi.
Tórtburysh saýsaq: Hıronomıa mundaı saýsaqty adamnyń tártipti, jınaqy, tabandy, yntaly hám dosqa adal bolatynyn aıtady. Salt-dástúrdi ustanýǵa, adam syılaýǵa beıim keledi. Naqtyly ǵylymdardy ıgerýge qabiletti, erik-jigeri myqty. Alaıda tórtburyshty saýsaq ıelerinen ózgege uqsamaıtyn erek qasıet ıeleri shyǵa bermeıdi, ózi túsinip, uǵýǵa shamasy jetpeıtin nárseni moıyndaýy qıyn. Oılamy da, is-áreketi de tek naqtylyqqa, materıaldyq negizge taban tireıdi. Munysy onyń adymyn ashtyrmaı, kúndelikti usaq-túıek tirliktiń qyzyǵyna baılap tastaıtyn jaǵdaılarda az ushyryspaıdy.
Doǵal saýsaq: Saýsaq bitimi mundaı jandar qaıratty, jigerli, derbes is-áreketke qushtar hám maqtan súıgishteý keledi. Basqanyń oı-pikirimen sanasa qoımaıdy, únemi derlik ózim bilemin, ózimdiki durys degen senim jeteginde júredi. Hıronomıa doǵal saýsaqtylardan jurtty sońynan erte biletin sheshen-kósemderdiń, myqty akterlardyń jıi shyǵatynyn aldyǵa tartady.
Salaly saýsaq: Mundaı adam qandaı qıyn sharýany da qınalmaı hám minsiz atqarýǵa qabiletti. Baýyrmal, jaqyn-jýyqtaryna, dos-jarandaryna qamqorlyq jasaýǵa ázir turady. Biraq basyna is túsken, tyǵyryqqa tirelgen kezderi tym usaqtap, ózine laıyqsyz áreketterge barý, joqtan ózgeni qazbalap, jón-josyqsyz qazymyrlyqqa salyný da salaly saýsaqtylarǵa jat qylyq emes deıdi hıronomıa.
Suq saýsaq: Onyń uzyndyǵy ortańǵy saýsaqpen birdeı bolsa, onda ondaı adamnyń ámirshil bolý, dańqa jetý múmkindigi ózgelerden áldeqaıda joǵary t.b. kóptegen dańqty qolbasshylardyń, elbasylardyń saýsaq bitimi osynyń dáleli, – deıdi mamandar.
Shynashaqtyń salaly bolýyn da hıronomıa bılikke, baılyqqa qol jetkizetindiktiń nyshany dep biledi.
Daıyndaǵan: QR «Qazaq psıhologıalyq qoǵamy» birlestiginiń múshesi, psıholog Qanapıaeva Baljan Nurǵalıqyzy
