Kezdesý barysynda Qazaqstan Prezıdenti sońǵy jyldary kásiporynnyń oń nátıjelerge qol jetkizip otyrǵanyn atap ótti dep habarlaıdy Qamshy.kz aqparat agenttigi QR Prezıdentiniń baspasóz qyzmetine silteme jasaı otyryp.

– Memleket tarapynan bastamalardyń bárine jan-jaqty qoldaý kórsetildi. Búginde kombınat meılinshe turaqty jumys istep, damyp kele jatyr. Qoldaǵy málimetke sáıkes, byltyr óndiristiń 10%-ǵa, kiris kóleminiń 20%-ǵa artqany baıqalady, – dedi Elbasy.

Memleket basshysy sheteldik kompanıalardy tartý arqyly ınovasıalyq jobalardy odan ári iske asyrýdyń qajet ekenine nazar aýdaryp, ol kásiporynnyń ári qaraı damýynyń mańyzdy tiregine aınalatynyn aıtty.

«Óskemen tıtan-magnıı kombınaty» aksıonerlik qoǵamy dırektorlar keńesiniń tóraǵasy S.Geller men kásiporyn prezıdenti Á.Mamytova kezdesýge múmkindik jasaǵany úshin Nursultan Nazarbaevqa alǵys bildirdi.

– Siz atap ótken óndiris kóleminiń ósýi áýe-ǵarysh jáne ónerkásip naryqtaryndaǵy jalpy ósimdermen baılanysty boldy. Birlesken kásiporyndar iske qosyldy, jobalyq qýatqa josparly túrde qol jetkizý baıqalýda, – dedi Á.Mamytova.

Qazaqstan Prezıdentine sheteldik áriptestermen birlese atqarylyp jatqan jumystar jóninde baıandaldy.

– 2014 jyly Fransıa úkimetimen birlesip, atom ónerkásibine arnalǵan tıtan quımalary men buıymdaryn óndiretin ekinshi kásiporynnyń qurylǵanyn eske salǵym keledi. Búginde zaýyt qurylysy aıaqtaldy. Bıylǵy 15 qyrkúıekte zaýyttyń ashylý rásimi ótedi, – dedi «Óskemen tıtan-magnıı kombınaty» aksıonerlik qoǵamynyń prezıdenti.

Sondaı-aq, Á.Mamytova kásiporynnyń ońtústikkoreıalyq «POSCO» kompanıasymen birlesken qyzmeti jóninde aıtty.

– Birlesken jobany iske asyrý jáne zamanaýı tehnologıalardy qoldaný Qazaqstan-Koreıa kásipornyna álemniń jalpaq tıtan prokaty naryǵyna shyǵýǵa múmkindik beredi, – dedi Á.Mamytova.

Memleket basshysy «Óskemen tıtan-magnıı kombınaty» aksıonerlik qoǵamynyń jumysymen qurylǵaly beri tanys ekenin aıtyp, kásiporyndy shıkizatpen qamtamasyz etý perspektıvasy jóninde surady.

Á.Mamytova quramynda tıtany bar shıkizattar halyqaralyq áýe-ǵarysh standarttaryna sáıkes alys shetelderden jetkiziletinin atap ótti.

– Bıyl «Óskemen tıtan-magnıı kombınaty» aksıonerlik qoǵamynyń 2022 jylǵa deıingi damý baǵdarlamasy aıasynda ılmenıt konsentratyn óndiretin ekinshi ken baıytý fabrıkasynyń qurylysy bastaldy. Qazaqstandyq úlesti arttyrý maqsatymen Úlbi metalýrgıa kombınatynyń mamandarymen birlesip ázirlengen jańa tehnologıalar engizildi, – dep túıindedi Á.Mamytova.