EKSPO-2017 kórmesi aıasynda Marshall Araldary Respýblıkasynyń Ulttyq kúni merekelendi. Resýrstar jáne damý mınıstrliginiń Halyqaralyq energetıkalyq josparlar jónindegi dırektory Angelın Haıne el 2020 jylǵa qaraı jańartylatyn energıa kózderiniń úlesin 20%-ǵa arttyrýdy josparlaıtyndyǵyn málimdedi dep habarlaıdy Qamshy.kz aqparat agenttigi.
«Marshall Araldary Respýblıkasynyń Úkimeti 2020 jylǵa qaraı jańartylatyn energıa kózderine 20%-ǵa kóshý maqsatyn alǵa qoıdy. EKSPO-2017 kórmesiniń «Bolashaq energıasy» taqyryby elimizdiń bolashaq damýymymen tyǵyz baılanysty. Qazaqstan sıaqty tabıǵı resýrstarǵa baı memleketter bolashaqtyń kilti energıada degen oıdy ustanýy senim men úmit týdyrady», – dep atap ótti Angelın Haıne.
Óz kezeginde Qazaqstan Respýblıkasy Qorǵanys jáne aeroǵarysh ónerkásibi mınıstriniń orynbasary Arman Ramazanov Qazaqstan Astana qalasyndaǵy Halyqaralyq mamandandyrylǵan kórmesin ótkizýde memleketimizge qoldaý kórsetken elderge alǵysyn bildirdi. Onyń aıtýynsha, EKSPO-2017 kórmesi eldiń úshinshi ónerkásiptik revolúsıaǵa ótýine yqpal etedi.
«Marshall Araldary Respýblıkasynyń Kórmege qatysýy eki eldiń jańartylatyn energıa kózderin izdeýde múddeleri men kúshteri ortaq ekendigin kórsetedi. Kórmeni ótkizý nátıjesinde qaýipsiz energıaǵa qol jetkizý men jasyl tehnologıalardy engizýge baǵyttalǵan álemniń damý tarıhynyń jańa kezeńi bastalady. EKSPO-2017 kórmesi Memleket basshysy atap ótken joǵary tehnologıaly materıaldardy jasaý, jańartylatyn energıa kózderin qurý jáne mamandardy daıyndaý men balamaly ekonomıkadan turatyn úshinshi ónerkásiptik revolúsıaǵa ótýge múmkindik beredi», – dedi A. Ramazanov.
Marshall Araldarynyń ekspozısıasy 11 memleket tanystyrylǵan Tynyq muhıty plazasynda usynylǵan.
Marshall Araldary Respýblıkasy – mıkronezıa quramyna kiretin klımattyq ózgeristerge táýeldi Tynyq muhıtynda ornalasqan memleket. Sondaı-aq Klımat jónindegi kelisimge qol qoıǵan alǵashqy aralda ornalasqan elderdiń biri bolyp tabylady. 2008 jylǵy munaı daǵdarysynan keıin Marshall Araldary jańartylatyn energıa kózderine kóshý boıynsha álemdegi qatań sharalardy qoldandy jáne parnıkti gazdar qaldyqtarynyń kólemin azaıtý jónindegi mindettemeleri týraly málimdedi.
