Túrkimenstan bıligi Azıa oıyndary qarsańynda Ashhabadta spırttik ishimdikterge tyıym saldy. Jergilikti BAQ-tyń jazýynsha, astanada saýda dúkenderinde alkogóldi ónimder tolyǵymen "joǵalyp ketken". Sharap satatyn dúkender de ýaqytsha qyzmetin toqtatqan dep habarlaıdy Qamshy.kz aqparat agenttigi Sentralasian.org saıtyna silteme jasap.
Assoshıeıted Pres (AP) aqparat agenttiginiń habarlaýynsha, bıliktiń aýyzsha buıryǵy boıynsha alkogóldi ónimderdi satýǵa qazan aıyna deıin tyıym salǵan.
Frans-press (AFP) aqparat agenttigi Saýda mınıstrliginiń qyzmetkerine silteme jasap, spırttik ishimdikterge 17-27 qyrkúıek aralyǵynda ótetin Azıa oıyndaryna baılanysty tyıym salyp otyrǵanyn habarlaıdy.
Saýda mınıstrliginiń qyzmetkeri bul qoǵamdyq tártipti qamtamasyz etý maqsatynda jasalynyp otyr degen.
15 tamyzda Túrkimenstan úkimeti áskerı jáne quqyq qorǵaý organdarynyń qyzmetkerleri kúsheıtilgen rejımde jumys isteıtinin málimdegen. Azıa oıyndary aıaqtalǵansha, vıza berý shektelgen.
