Jýyrda kópbeıindi qalalyq aýrýhanasyna Reseı Federasıasynyń eńbek sińirgen dárigeri, profesor Edýard Gallámov, medısına ǵylymynyń kandıdaty Svetlana Gallámova jáne Aqtóbeden kelgen medısına ǵylymynyń doktory, profesor Vladımır Kotlobovskıı ýrologıa, gınekologıa jáne hırýrgıa baǵyttary boıynsha kelip, sheberlik saǵatyn ótkizdi.
Joǵary bilikti dárigerler qalalyq aýrýhananyń naýqastaryn baqylaýǵa alyp, laparoskopıalyq, endovıdeohırýrgıalyq ota jasaýdyń jańa tásilderin kórsetti.
Mamandardyń aıtýynsha, laparoskopıa jáne endovıdeohırýrgıa – naýqastyń ishki aǵzasyna ota jasaý úshin tilik jasamaı emdeıtin hırýrgıanyń jańa ádisi bolyp tabylady. Bul tásilmen ota jasalǵan emdelýshi bir-eki kún ishinde aıaqqa turyp ketedi eken.
– Buǵan deıin Astana, Almaty, Aqtaý, Qaraǵandy qalalarynda bolyp, óz tájirıbemmen bólistim. Endi Oral qalasyna da kezek keldi. Aldaǵy úsh kún ishinde segiz laparoskopıalyq ota jasamaqpyz. Kez kelgen naýqas onsyz da aýyryp, mazasy ketip turǵan soń, eń jeńil tásilmen em alǵysy keledi. Al laparoskopıalyq tehnologıa arqyly naýqastyń denesin eshbir tilýsiz emdeýge qol jetkizdik. Tek bir-eki jerden kólemi 0,5-1,5 sm bolatyn tesikter jasaımyz. Bundaı tásil emdelýshiniń qalypty jaǵdaıǵa kelýin tezdetedi. Sonymen qatar dárigerge aǵzanyń sýretin úlken ári anyq etip kórsetetin endovıdeohırýrgıada qoldanylatyn eń jańa 3D formattaǵy vıdeojúıe otanyń qaýipsizdigin odan ári arttyrady, – deıdi Edýard Abdýlhaevıch.
Atalǵan aýrýhanynyń dırektory Arman Qalıbekovtyń aıtýynsha, jergilikti dárigerler de ota jasaý prosesine qatysyp, jańa ádis týraly bilim-biligin arttyrýda. Al qalǵan mamandar aýrýhananyń májilis zalynda otyryp, otany 3D formatty teledıdardan baqylaǵan. Olarǵa laparoskopıalyq «Karl Storz» apparatymen jumys jasaýdy úıretý úshin mýllájdarǵa ota jasatyp kórsetken.
– Negizi bizde mundaı operasıalar jasalyp júr, alaıda ǵylym bir orynda turmaıdy. Ásirese medısına salasynda jańa ádister jıi paıda bolyp jatady. Sondyqtan halyqaralyq deńgeıde tájirıbe almasyp turý óte mańyzdy, – deıdi Arman Talǵatuly.
Gúlim AQAP,
Batys Qazaqstan oblysy
