2017 jyldyń 9-13 qyrkúıek aralyǵynda Astanada Qazaqstan Respýblıkasy Mádenıet jáne sport mınıstrligi jáne Qazaqstan teatrlar assosıasıasy halyqaralyq EKSPO-2017 kórmesiniń mádenı baǵdarlamasy aıasynda halqymyzdyń birtýar tulǵasy, Qazaqstannyń eńbek sińirgen óner qaıratkeri, Memlekettik syılyqtyń ıegeri, kórnekti teatr synshysy Áshirbek Syǵaıdyń 70 jyldyǵyna arnalǵan Qazaqstan drama teatrlarynyń XXV respýblıkalyq festıvalin ótkizedi dep habarlaıdy Qamshy.kz aqparat agenttigi.

Festıváldiń negizgi maqsaty – bar ǵumyryn teatr ónerine arnaǵan sarabdal synshy, biregeı teatr qaıratkeriniń shyǵarmashylyǵyn kópshilikke dáripteý, sońynan qaldyrǵan muralaryn jańǵyrtý, esimin el esinde máńgi qaldyrý.

Sondaı-aq, Qazaqstandaǵy teatr óneriniń búgingi damý baǵyttary men kórkemdik kelbetin zerdelep, ózara shyǵarmashylyq qarym-qatynasty odan ári nyǵaıtý, teatr ónerindegi sabaqtastyqty saqtap, jańashyldyq úrdisterdi damytý, daryndy akterler men rejıserlerge qoldaý kórsetý – maqsat-muratymyzǵa aınalyp otyr.

Festıválge sońǵy 2-3 teatrlyq maýsymda tusaýkeseri ótken jáne bedeldi teatr synshylarynyń joǵary baǵasyna ıe bolǵan, buryn festıválderge qatyspaǵan úzdik qoıylymmen qatysýǵa elimizdiń drama, mýzykalyq drama, mýzykalyq-komedıa, satıra, balalar men jasóspirimder teatrlary qatysady.

Festıváldiń resmı ashylýy 9 qyrkúıek kúni, saǵat 17:00-de «Jastar» teatry sahnasynda ótedi.

Festıválge Respýblıkalyq Ǵ.Músirepov atyndaǵy qazaq Memlekettik akademıalyq balalar men jasóspirimder teatry, Atyraý oblystyq Mahambet atyndaǵy qazaq drama teatry, Respýblıkalyq akademıalyq nemis drama teatry, Q.Qýanyshbaev atyndaǵy Memlekettik akademıalyq qazaq mýzykalyq drama teatry, Aqmola oblystyq orys drama teatry, Astana Jastar teatry, Shyǵys Qazaqstan oblysy «Darıǵa-aı» jastar teatry, «Jas sahna» teatrlary qatysady. 

Bes kún boıy Astana qalasynyń qonaqtary men turǵyndary festıvál qoıylymdaryn Q.Qýanyshbaev atyndaǵy Memlekettik akademıalyq qazaq mýzykalyq drama teatry, «Qazaqstan» Ortalyq Konsert Zaly jáne Jastar teatry sahnalarynan tegin tamashalaı alady.

Festıváldiń resmı jabylý saltanaty 13 qyrkúıek kúni, saǵat 18:00-de «Astana Balet» teatry sahnasynda ótedi.