Eýrazıalyq Top (ERG) pen Bahia Mineração jylyna 20 mln. tonna ónim beretin temir keni óndirisiniń jobasyna qatysty Baıa shtaty jáne qytaılyq konsorsıýmmen ózara túsinistik týraly Memorandýmǵa qol qoıdy, dep habarlaıdy Qamshy.kz aqparat agenttigi Korporatıvtik komýnıkasıalar departamentiniń baspasóz qyzmetine silteme jasap.
Tabıǵı resýrstardy óndirý jáne baıytý salasyndaǵy álemdegi iri ártaraptandyrylǵan jetekshi kompanıalardyń biri Eurasian Resources Group (ERG nemese Top), jáne onyń Brazılıadaǵy júz paıyzdyq enshiles kásiporny Bahia Mineração («BAMIN») jylyna 20 mln. tonna ónim beretin temir keni óndirisi jobasyna qatysty Baıa shtaty jáne qytaılyq konsorsıýmmen jalpy somasy 2,4 mlrd dollarlyq ózara túsinistik týraly Memorandýmǵa qol qoıǵanyn jarıalaıdy. Joba BAMIN–niń ıeligindegi Pedra de Ferro temir keni kenishin, tereń sýly Porto Sul teńiz aılaǵy jáne onymen baılanystyratyn FIOL temir jol torabyn qamtıdy. Memorandýmǵa brazılıa jáne qytaı bıznesi ókilderiniń eki jaqty kezdesýi barysynda qol qoıylyp, saltanatqa Qytaı Halyq Respýblıkasynyń tóraǵasy Sı Szınpın men Bralızıa Federatıvtik Respýblıkasynyń prezıdenti Mıshel Temer qatysty.
Qytaı konsorsıýmy China Railway Group, China Communications Construction Company jáne Dalian Huarui Heavy Industry Group syndy jetekshi ınfraqurylymdyq ári mashına jasaýshy qýatty kásiporyndardan turady. Memorandým konsorsıýmnyń BAMIN-men birlesip kenishke, temir joly men teńiz aılaǵyna ıelik etý, biriktirilgen keshendi damytý men ony qarjylandyrý isin uıymdastyrýǵa múddeli ekenin aıqyndaıdy.
Sondaı-aq, Memorandýmda Baıa shtaty Porto Sul aılaǵyna aýyl sharýashylyǵy ónimderi men ózge de taýarlardy tasymaldaýǵa ruqsat, ári teńiz ben FIO temir jolyna jeńildikter bere otyryp, jobany damytýǵa qoldaý kórsetetini jazylǵan.
Baıa shtatynyń gýbernatory Rýı Kosta dýsh Santýsh jańa jumys oryndaryn ashý men búkil shtattyń damýyn qamtamasyz etýdegi atalǵan qadamnyń mańyzyn aıryqsha atap aıtty.
Memorandým jaıynda tarqata aıtqan ERG dırektorlary Keńesiniń Tóraǵasy d-r Aleksandr Mashkevıch: «Atalǵan kelisim barlyq seriktester úshin mańyzdy jetistik. Pedra de Ferro kenishin iske qosqannan keıin ol jyl saıyn álemdik naryqqa 20 mıllıon tonnaǵa deıingi kólemde joǵary sapaly temir kenin turaqty jetkizip, álemdegi ozyq jetkizýshilerdiń biri retindegi ERG-diń pozısıalaryn nyǵaıta túspek. Men Baıa shtatynyń jobaǵa qoldaý kórsetkenine erekshe qýanyshtymyn ári onyń jergilikti ekonomıkaǵa ákeler artyqshylyqtaryn maqtan tutanymyn. Óıtkeni Top ózi jumys isteıtin barlyq qaýymdastyqtardyń ornyqty damýyna bar kúshin baǵyttaıdy»,- dep túıindedi sózin.
«BAMIN-niń damýyndaǵy mańyzdy kezeńdi eńsergenimiz úshin men erekshe qýanyshtymyn», – dedi ERG-diń Bas atqarýshy dırektory Benedıkt Sobotka. Qurlyqaralyq Bi-Oceanic temir jolyna arnalǵan qurylys blogyn qurý men álemdegi eń tartymdy temir keni kenishteriniń birin ıgerý isin yntalandyrý maqsatyn kózdegen atalǵan jobanyń arqasynda biz qytaıdyń birqatar jetekshi kásiporyndarymen seriktese jumys istep, Baıa shtatymen áriptestiktiń nyǵaıttyq.
Brazılıanyń soltústik-shyǵysyndaǵy Baıa shatatynyń Kaetıte kentiniń mańynda ornalasqan Pedra de Ferro kenishinen joǵary surypty temir keni ıgeriletin bolady. Óndiriske engizilgen soń, kenishten jylyna 20 mıllıon tonna joǵary sapaly temir keni óndirilip turmaq. Sonyń ishinde ylǵaldy óńdeýdi qajet etpeıtin joǵary sapaly taýarlyq temir keni de bar. Pedra de Ferro kenishindegi shıtkizat qorynyń kólemi men aýqymy ári onyń logıstıkalyq ınfraqurylymdarǵa qol jetimdiligi kenishti álemdegi eń ekonomıkalyq tıimdi kenishterdiń biri etpek.
Porto Sul - Baıa, Ileýs qalasynyń soltústiginde ornalasqan tereń sýly teńiz aılaǵy. Ol kópttonnaly iri sý kólikterin qabyldap, BAMIN-niń kenderin jóneltýdiń alǵashqy qadamyna aınalmaq. Sondaı-aq aýyl sharýashylyǵy jáne basqa da taýarlardyń mańyzdy tirek eksport jáne ımport ortalyǵyna aınalmaq.
FIOL temir joly – Brazılıanyń soltústik-shyǵysyndaǵy negizgi tasymal dálizine aınalatyn keń jolaqty jańa temir jol jelisi. Kezeń-kezeńimen damyp kele jatqan temir jol jelisiniń alǵashqy butaǵy Porto Sul aılaǵynan eldiń ishine qaraı Kaetıte kentine deıin 535 shaqyrymǵa sozylǵan. Kelesi kezeńde torap Brazılıanyń basty aýyl sharýashylyǵy ortalyqtaryna jalǵasyp odan ary ózge de temir jol jelilerimen túıispek. FIOL temir joly Brazılıa federatıvtik úkimetiniń menshigi. Óz kezeginde ol konsesıalyq kelisim shart aıasynda ony jeke ınvestorlarǵa satýǵa múddeli ekenin jarıalady.
