Júrip turǵan jer-jahanǵa ámiri,

Kúndeı ashyq kúrkiregen bar úni.

Uly Maǵjan - ulylyqtyń qudaıy,

Uly Maǵjan - óleń, jyrdyń Táńiri!

Birde júrmeı, birde baspaı órge isi,

Bosatpady tartyp ony jer kúshi.

Tolqyn, tolqyn, qaıratty shash bup-buıra

Uly Maǵjan taǵdyrynyń belgisi.

Er jigitte ol, sulýlyqtyń jamaly,

Júreginde qozdap oılar janady.

Tula boıy kemeńgerlik keremet,

Meıirimge toly oıly janary.

Bar qaıratyn «Alashyna» arnady,

Názik syrdy jyldamdyqpen ańdady.

Bar Túriktiń altyn, asyl tamyry

Uly Turan, Túrkistany - armany.

Elden erek, zerek boldy uǵymy,

Uly ǵana túsinedi ulyny.

Boıda týlap, Er Túriktiń qaıraty,

Arpalysqa toly boldy ǵumyry.

Ózge aqyndar bilmeıtindi biletin,

Jaýlaryna jany ashyp, kúletin.

Uly Turan, Túrkistanǵa baıraǵyn

Qaıta tiger kúnderdi ańsap júretin.

Mılarynda alýan oılar pisetin,

Oǵan azdaı qandaı-qandaı mise tym.

Ana Sábıt, tabalasa qanshama,

Al, Maǵjan, qaısarlana túsetin.

Ońashada dalasyna syımaıtyn,

Saǵynyshtan kóz janaryn sýlaıtyn.

Álıhandy, Ahmetti jáne de

Mirjaqyp pen Mustafany syılaıtyn.

Týa kerbez, ózin jaqsy kútingen,

İsteri kóp, isterinen bitirgen.

Ámir-Temir, Han Kenege Táńirdeı

Tabynatyn barlyq bolmys, bitimmen.

Oı jetken be, onyń tereń oıyna,

Shaq kelmeıtin júkti almaıtyn boıyna.

Qazaǵynyń mynaý darhan dalasy

Bar qajetti bere salǵan boıyna.

Qarsy soqqan tolqyndardy elemeı,

Mań dalada jalǵyz júzdi ol kemedeı.

Dóńbekshigen Hazar, Balqash sıaqty

Bilimi onyń teńizdeıin telegeı.

Janyp júrdi ol jyr otyna jalyndaı,

Ómir keshti jaýlaryna baǵynbaı.

Bar Túriktiń bolǵan altyn besigi

Túrkistanyn súıýshi edi jalyndaı.

Maqsaty aıqyn, túptiń-túbi jetetin,

Uly oılarmen uly kúnder ótetin.

Keı sátteri Qara Ertistiń boıymen

Kókbórideı jalǵyz jortyp ketetin.

Qushtarlyqpen bar qazaqtan alda edi,

Enesinen dara emgen arda edi.

Ol túsindi bolmysymen ǵajaıyp,

Qurmet tutyp, syılaıtynyn alda eli...

Kúresetin oılarymen aldyrmas,

Shyndap súıse, esten búıtip tandyrmas?

Kóne Turan, uly Otyrar shahary

Taǵdyrymen bolýshy edi taǵdyrlas.

Uly Maǵyjan, shyn máninde uly edi,

Jalǵyz ǵana týǵan ulty - tilegi.

Kúndiz-túni qazaq degen halqynyń

Táńirden azattyǵyn tiledi.

Súıdi erekshe, mynaý saıyn dalasyn,

Súıdi erekshe, Farabıdeı danasyn.

Bastan keshken dúrbeleńdi kezeńdi,

Qadyr tutty ol, jaýynger ult, babasyn.

Saǵynyshtan san sarǵaıǵan sanasyn,

Syılap ótti ol, ózin týǵan anasyn.

Qurmet tutty ol, Er Túrikti keshegi

Bılep turǵan jer men kóktiń arasyn.

Japa shegip, jaýlarynan ońbaǵan,

Qaıǵy bulty Ystambulyn torlaǵan...

Sol kezdegi jalǵyzdyqtan qan jutyp,

Jasyn tógip, qandastaryn qoldaǵan...

Jaýy kóp pe, jaǵalaǵan jar astyn,

Shabyttansa, Kók Táńirmen janasty ún.

Uly Maǵjan, sırek biter mańdaıǵa

Bolýshy edi ardageri «Alashtyń».

Aıy jaryq týdy talaı ońynan,

Ol túspedi jyr-jelmaıa qomynan.

Qurban bolǵan qapıada qaıran er,

Qan tilegen qyzyldardyń qolynan.

Joǵaltqandaı asyl arman, muratyn,

Syńsı joqtap, qala berdi bula tún.

«Uly Turan, Túrkistan...» dep jyrlaýmen

Ótti osylaı bul ómirden bir aqyn.

Tabanymnan ketkendeı me, tas taıyp,

Maǵjanyn joqtamasa el, basty aıyp.

Almatydan bir eskertkish buıyrmaı,

Ankarada tur Maǵjan qasqaıyp...

«Bizde de bar...» dep aıtýǵa shaq qaldym...

Atqany erek Ankarada aq tańnyń!

Ana túrik baýyrlardyń aldynda,

Meniń daǵy kelip ketken maqtanǵym...

Ul qadirin bilmedi me, elge syn,

Bilmedik-aý, sóz etýden óńgesin.

Astanadan kórem ǵoı dep oılaǵam,

Maǵjanymdy Ankaradan kórgesin...

Jumash Kókbóri