Karıb teńizi aımaǵyndaǵy birneshe eldi jaıpap ótken «Irma» alapat daýylynan qaza tapqandardyń sany 18-ge jetti. Bul týraly Qamshy.kz aqparat agenttigi sheteldik BAQ málimetine súıenip habarlaıdy. 

Dúleı jel Antıgýa, Barbýda, Sent-Martın, Sen-Bartelemı jáne taǵy birneshe araldy eldi oırandap ketti. Endi saǵatyna 250 shaqyrym jyldamdyqpen soqqan daýyl Bagam araldaryna jetip, Kýba jaǵalaýyna taıap qaldy.  Mamandar dúleı daýyl endi AQSH-tyń Florıda shtatyna soǵady dep otyr.

Tóngen qaýipke baılanysty Qurama Shtattardyń birneshe aımaǵynda tótenshe jaǵdaı jarıalandy. Birqatar aýdan turǵyndaryn qaýipsiz jerge kóshirý bastaldy. Júzdegen áýe reısi keıinge shegerildi. Jergilikti bılik «Irma» Tehas shtatynda soqqan «Harvı» daýylynan da joıqyn bolady dep eskertti. Biraq qazir mamandar dúleı jeldiń ekpini sál báseńdep, 5 baldyq deńgeıden 4-dárejege tómendegenin aıtady. Degenmen Florıdaǵa daýyldyń saldarymen kúresý úshin 7 myńnan astam sarbaz kelip úlgerdi.