Aqorda tartqan aqparat boıynsha, búgin Nursultan Nazarbaev Rejep Taııp Erdoǵandy Astanada saltanatpen qabyldaǵan.

– Qansha kezdessek te kóp bolmaıdy. Qazirgi zamannyń ózi qıyndap tur. Jıi kezdesip, kóp aqyldasý kerek. 25-26 jyl ishinde Qazaqstan men Túrkıa arasyndaǵy qarym-qatynas dostyq ári baýyrlastyq baǵytta damyp keledi, – degen Nursultan Nazarbaev.      

Sondaı-aq Nursultan Nazarbaev Túrkıa Prezıdentine bıylǵy 10 qyrkúıekte Astanada Islam yntymaqtastyǵy uıymynyń ǵylym jáne tehnologıalar jónindegi samıtine qatysýǵa nıet bildirgeni úshin alǵys aıtqan.    

Budan bólek, Memleket basshysy bıylǵy 14 qyrkúıekte elordamyzda Sırıadaǵy qarýly qaqtyǵysty retteý jónindegi Astana kelissózderiniń altynshy raýndy ótetinine nazar aýdardy.

Túrkıa Respýblıkasynyń Prezıdenti Qazaqstanǵa saparmen kelýge shaqyrǵany úshin Nursultan Nazarbaevqa rızashylyǵyn bildirdi. 

– Astanaǵa kelgenime qýanyshtymyn. Men alǵash ret Qazaqstanmen Almaty qalasyna barǵan saparymda tanysqan edim. Endi jańa qalaǵa, jańa elordaǵa kelip otyrmyn, Qazaqstandy ózimniń ekinshi úıimdeı kóremin, – dedi R.Erdoǵan.

Túrkıa Prezıdenti óz eliniń Qazaqstanmen saıası, ekonomıkalyq, mádenı, áskerı qatynastardy damytyp jatqanyn atap ótti.    

– Búginde elderimiz arasyndaǵy taýar aınalymy 2 mıllıard dollar shamasynda. Árıne, bul jetkilikti emes. Biz keliskendeı, maqsatymyz – taýar aınalymyn 5 mıllıard dollarǵa jetkizý. Túrkıa men Qazaqstannyń áleýeti oǵan jetkilikti,  – degen Túrkıa Respýblıkasynyń basshysy.

Túrkıa Prezıdenti bıylǵy 14 qyrkúıekte Astanada Sırıadaǵy jaǵdaıǵa qatysty kezdesýdiń mańyzdylyǵyna toqtalyp, onyń Jeneva kelissózderine oń yqpal etetinine senim bildirdi.      

Aıta ketetin bolsaq, Bul Erdoǵannyń Astanaǵa prezıdent retinde ekinshi kelýi. Jurt ony EXPO-Astana kórmesi ashylýy kezinde Nazarbaevtiń qonaǵy bolady dep kútken. Alaıda Erdoǵan Astanadaǵy EKSPO-nyń jabylýyna keldi.

Sondaı-aq, Ázerbaıjan basshysy Ilham Álıev te búgin tús aýa Astanaǵa keldi.