Orta salmaqta WBA (Super), IBO, WBC jáne IBF tujyrymdary boıynsha álem chempıony qazaqstandyq boksshy Gennadıı Golovkın (37-0-1, 33 KO) QR Prezıdentiniń atyna alǵys sózderin Qaraǵandy oblysynyń ákimimen kezdesý barysynda aıtyp jetkizdi, - dep habarlaıdy Qamshy.kz aqparat agenttigi Vesti.kz saıtyna silteme jasap.
Sportshynyń aıtýynsha, bul qoldaý Alvarespen ótken ymyrasyz jekpe-jekte erekshe qajet bolǵan eken.
"Birinshi kezekte men memleketimizdiń Basshysy Nursultan Ábishuly Nazarbaevqa osyndaı qoldaý kórsetip, jylylyq syılaǵany úshin alǵysymdy bildigim kelip otyr. Ol jekpe-jekti qalyń jurt kórdi dep oılaımyn. Meniń jekpe-jegimdi tikeleı efır arqyly Prezıdent kórgenin estigende, árıne, meniń júregimde, keýdemde kóptegen emosıalar boldy, - dedi Gennadıı Golovkın. - Adamı turǵydan alsaq, bul janǵa jaılylyq pen maqtanysh uıalatatyn óte tamasha jaıt. Jáne de Prezıdentimizdiń sportqa jankúıerlik etetinine barlyq qazaqstandyq bul maqtanyshty menimen birge bólisti dep oılaımyn".
Óz kezeginde oblys ákimi Gennadıı Golovkınge rýhanı jańǵyrý baǵdarlamasyn júzege asyrýda qosyp júrgen úlesi úshin raqmet aıtty.
"Bizdiń Prezıdentten bastap elimizdiń árbir turǵyny saǵan jankúıer boldy. Bizdiń Qazaqstannyń, Qaraǵandynyń atyn osylaı asqaqtatyp júrgenińe úlken alǵys aıtamyz", - dedi Erlan Qoshanov.
Eske salaıyq, WBA, IBF, WBC, IBO nusqalary boıynsha álem chempıony Gennadıı Golovkın Qaraǵandyǵa balalar oıyn sport alańyn syılaǵan bolatyn. Keshen onyń týyp ósken aýlasy - Maıqudyqtyń 14-shi yqsham aýdanynda ornatylǵan.
Kezdesýdiń basty taqyryby aımaqta balalar sportyn damytý tóńireginde órbidi. Boksshy Maıqudyqtaǵy onyń esimi berilgen sport kesheninde bolyp qaıtqanyn jetkizdi. Ony bul nysan qanshalyqty suranysqa ıe ekeni - oǵan kelýshiler qatary qalyń ba joq pa, balalar qandaı sport túrlerine kóbirek beıim ekeni qyzyqtyrdy. Gennadıı bul sport nysanyn ári qaraı damytý týraly usynys bildirdi.
Aıta keteıik, Las-Vegasta ótken jekpe-jek 12 raýndqa sozyldy. Jekpe-jek qorytyndysy boıynsha Golovkın men Alvares teń túsip, Golovkın barlyq tıtýlyn saqtap qaldy.
Sondaı-aq, keıinirek jekpe-jektiń tolyq vıdeosy jarıalandy. Sonymen qatar, Sporttyq komısıa basshysy "Kanelonyń" paıdasyna daýys bergen tóreshini shettetti.
