Qazaqstan Respýblıkasy Aqparat jáne komýnıkasıalar mınıstrliginiń qoldaýymen «Qazmedıa ortalyǵy» xalyqaralyq medıa-xabynyń aýmaǵynda Astana Media Week birinshi qazaqstandyq medıaaptalyq óz jumysyn bastady.

Qazaqparat tilshisiniń habarlaýynsha, sharanyń ashylý rásimine qatysqan QR Aqparat jáne komýnıkasıalar mınıstri Dáýren Abaev tuńǵysh ret uıymdastyrylyp otyrǵan medıaaptalyq tek Qazaqstanda ǵana emes, aımaqtaǵy ortaq medıa naryqty qalyptastyrýǵa jáne odan ári damytýǵa negiz bolady dep senetindigin basa aıtty.

«Osy oraıda eń aldymen búgingi jıynǵa arnaıy kelgen sheteldik áriptesterimizge alǵys aıtamyz. Qazaqstan Prezıdenti Nursultan Nazarbaevtyń tapsyrmasymen irgesi qalanǵan «Qazmedıa» ortalyǵy aldaǵy ýaqytta aımaqtaǵy yqpaldy medıahab retinde úlken ról atqarmaq. Astana Media Week osy ortalyq aıasyndaǵy biregeı medıaǵa aınalady dep senemiz. Tutastaı alǵanda búgingi sharanyń basty maqsaty otandyq medıa naryqty damytý ǵana emes, mádenı jáne aqparattyq baılanystardy da tereńdetý. Birneshe kúnge sozylatyn jıyndy osy saladaǵy sońǵy ózgerister men sıfrlyq tehnologıalardy damytý, óńirlik BAQ-tyń máseleleri talqylanady. Osynyń barlyǵy qatysýshylar úshin ozyq tájirıbemen tanysyp, sheberligin shyńdaýǵa, jańa tehnologıalardy el ıgiligine jaratýǵa berilgen úlken múmkindik», - dedi Dáýren Abaev.