Óńirlik úılestirý keńesi bıylǵy jyldyń basynan beri Almatyda 154 bıznes-josparyn maquldaǵan. Jyl sońyna deıin kásipkerlerge barlyǵy 4,4 mlrd teńge bólinedi. Bul qarajat grant, sýbsıdıalaý jáne qaryzdy kepildendirý túrinde beriledi dep habarlaıdy Qamshy.kz aqparat agenttigi.

Almaty qalasy kásipkerler palatasynyń jobalardy súıemeldeý bóliminiń basshysy Alma Turlybaeva «Bıznestiń jol kartasy – 2020» baǵdarlamasy aıasynda kórsetiletin qoldaýdy túsindirip ótti.

«Ekinshi deńgeıli bankter komersıalyq nesıeni 19-24% joǵary mólsherlememen beredi. Al «Bıznestiń jol kartasy – 2020» biryńǵaı baǵdarlamasy aıasynda qaryzdyń syıaqy mólsherlemesi – 7-10%. Qalǵan somanyń barlyǵy da memleket esebinen tólenedi. Óńirlik úılestirý keńesiniń 60% bıznes-qoǵamdastyq ókilderinen turady, sonymen qatar jergilikti atqarýshy organnyń ókilderi de bar. Bıznes-jobalar ár apta saıyn qaralady. Bıznes jospardańy jańa jumys oryndaryn ashý men qala búdjetin tolyqtyrý krıterııine basa nazar aýdarylady. Al Almaty qalasynda bul baǵdarlama boıynsha qarajat 100% ıgerilip keledi», – dep túsindirdi Alma Turlybaeva.

Óńirlik palata ókiliniń aıtýynsha Almaty qalasynda bıznesti qoldaýǵa arnalǵan birneshe baǵdarlama qatar qoldanylady. Olardyń ishinde respýblıkalyq baǵdarlamalar da, óńirlikter de bar. Mysaly «Almaty–týrızm» baǵdarlamasymen bıylǵy jyly 5 jobaǵa 398 mln teńge qarajat bólindi. Al «Almaty ınovasıa» baǵdarlamasymen jalpy 90 mln teńgeni 2 joba aldy. Sondaı-aq «Jibek joly» baǵdarlamasy da sátti júzege asyrylyp keledi. Saýdany damytý úshin 66 jobaǵa jalpy 4 mlrd teńge qarajat berildi. «Almaty ónim» arqyly 8 joba jalpy 429 mln teńge aldy.

Memlekettik qoldaý kórsetilgen kompanıalardyń biri – Almaty qalasynda ornalasqan «Sın-Kaz» JSHS. Elimizde 19 jyldan beri jumys istep kele jatqan kompanıa tomat jasaý pen kókónis konservileýden úzdik kásiporyn retinde tanyldy. Búginde kásiporyn óniristiń jelini jańartýdy qolǵa alǵan.

«Sın–Kaz» JSHS sapa jónindegi menedjeri Janar Rahymbekovanyń aıtýynsha óndiristi avtomattandyrý, jańǵyrtý jáne keńeıtýge arnalǵan bıznes-jospar aıasynda 618,5 mln teńge ınvestısıa tartylǵan. Búginde bul somanyń 418 mln teńgesi ıgerilgen. Onyń ishinde 71 mln teńge sýbsıdıa retinde memleketten berilgen. Osy qoldaýdyń arqasynda jańadan eki seh ashyldy.

«Óndiristi avtomattandyrý men jetildirýge arnalǵan joba aıasynda kóknis salaty men soıa tuzdyǵyn daıyndaıtyn jańa 2 seh ashtyq. Qazaqstanda soıa tuzdyǵy shyǵarylmaıdy. El naryǵynda ımporttyq tuzdyq bar. Al bizdiń kompanıa aıyna shamamen 30 myń soıa tuzdyǵyn óndirýde. Qazirgi tańda 3 túrli tuzdyq shyǵarylady», – dep habarlady «Sın–Kaz» ókili.

Kompanıa ókiliniń aıtýynsha soıa tuzdyǵyn daıyndaý úshin shıkizat Qytaıdan jetkiziledi. Al salat jabý úshin jergilikti sharýalardyń ónimderi paıdalanylady. Byltyrǵy jyly 500-600 tonna salat jabý josparlansa, bıyl bul jospar eki esege ulǵaıǵan.

«Bizdiń ónimderimiz elimizdiń barlyq óńirlerine taraıdy. Sonymen qatar bazarlarda, dúkenderde de tabýǵa bolady. EAEO aıasynda ótetin barlyq kórmelerge qatysyp kelemiz. Negizgi eksportqa shyǵatyn el Reseı, sondaı-aq Qyrǵyzstan, Aýǵanstan elderimen seriktestik qatynastamyz. Jalpy shyǵarylǵan ónimniń 20% Almaty qalasy men oblysyna taraıdy», – dep habarlady kompanıanyń Sapa jónindegi menedjeri Janar Rahymbekova.

Kompanıa jyl sońyna deıin Reseı men Qyrǵyzstanǵa jetkiziletin ónim kólemin 500 tonnaǵa deıin jetkizýdi kózdep otyr.

«Biz ónimderimizdi EAEO aýmaǵynda ótetin kóptegen kórmege shyǵarýǵa tyrysamyz. Reseıde ónimniń belgilengen baǵasyn tómendetýge tyrysamyz, sebebi básekelestik joǵary. Biraq bizdiń ónimimizdiń dámin tatqannan keıin unatatyndary qanshama. Jalpy kórshiles elde qazaqstandyq ónimdi sapasy joǵary dep qabyldaıdy. Búginde Reseıdiń birqatar qalalaryna, onyń ishinde Máskeýge de jetkizemiz. Sondaı-aq biz kechýptar men salattardy Máskeýdegi «Foodcity» bazaryna shyǵarýǵa kelisim jasap jatyrmyz. Aldaǵy ýaqytta Tájikstanǵa da eksporttaýǵa nıettimiz», – deıdi «Sın-Kaz» JSHS Ótkizý bóliminiń basshysy Taır Týtadze.

Kompanıa ókili elektr qýaty men sýǵa qoıylatyn tarıf óte joǵary ekenin atap ótti. Elektr qýaty men sýdy úzdiksiz paıdalanatyn óndiris úshin tarıftiń rettelgeni mańyzdy. Bul qyzmetterdegi baǵany retteý bıznes úshin aıtarlyqtaı kómek bolar ekenin jasyrmady.