Qazaqstanda Qyrǵyzstannan keletin sút ónimderine tyıym salyndy, dep jazady Qamshy.kz aqparat agenttigi. Bul týraly QR Aqparat jáne komýnıkasıa mınıstrligi habarlaıdy.

Mınıstrliktiń habarlaýynsha, búginde memlekettik shekaranyń qazaq-qyrǵyz bóligin baqylaý josparly túrde júzege asyp jatyr. Baqylaý «sur ımport» aýmaǵyn qysqartý maqsatynda  EEQ zańnamasynyń aıasynda júrgizilýde.

Onyń ústine 10 qazanda qazaq-qyrǵyz shekarasynda veterınarlyq baqylaý kúsheıtilgen. Qazirgi tańda shekaranyń 6 veterınarlyq pýnktinde 32 ınspektor qyzmet atqarady.

«Búginde bes qyrǵyzstandyq sút óndirý kásiporyndarynyń ónimderin Qazaqstanǵa ımporttaýǵa tyıym salyndy. Sebebi kásiporyndardyń ınspeksıasy men ımorttyq ónimderdiń monıtorngin buzý budan buryn anyqtalǵan. Eki qyrǵyzstandyq kásiporyndarǵa qatysty zerthanalyq baqylaý kúsheıdi», - delingen habarlamada.

13 qazanda «Qarasý» beketinde veterınarıalyq sertıfıkatty rásimdeý kezinde buzýshylyqtary anyqtalǵan azyq túlik taýarlary bar kólik ustaldy. Nátıjesinde, 226,9 myń teńge kóleminde aıyppul salynyp, júk kóligi keri qaıtaryldy.

Qyrǵyz Respýblıkasynyń veterınarlyq jáne fıtosanıtarlyq qaýipsizdik memlekettik ınspeksıasynyń dırektory Qalym Jumaqanovtyń aıtýynsha, Qazaqstanda  28 otandyq kásiporynnyń ónimin ımporttaýǵa quqyǵy bar, onyń 15-i sút ónimderi. Alaıda Jumaqanov tyıym salyný týraly aqparattan habarsyz bolyp shyqty.