Qazaqstan men Qyrǵyzstan úkimetteri qazaq-qyrǵyz shekarasynan ótýdiń tártipterin belgiledi dep habarlaıdy Qamshy.kz aqparat agenttigi azattyq.org-qa silteme jasaı otyryp.
Qazaqstan premer-mınıstri Baqytjan Saǵyntaevtyń málimdeýinshe, bul týraly eki el premerleri men úkimet delegasıalarynyń 18 qazanda ótkizgen kelissózinde ýaǵdalastyq jasalǵan.
Kelissózde eki jaq 19 qazan saǵat 00:00-den bastap eki el el shekarasynda, ásirese Qordaı ótkizý beketinde jeke júgi bar jekelegen adamdardy, turaqty jolaýshylar tasymaldaıtyn kólikterdi, jeńil kólikterdi, bos ketip bara jatqan júk kólikterin birinshi kezekte ótkizip jiberýge ýaǵdalasqan.
Tún ortasyna deıin sozylǵan kelissózge Qyrǵyzstan premer-mınıstri Sapar Isakov bastaǵan úkimet delegasıasy men Qazaqstan premer-mınıstri Baqytjan Saǵyntaev bastaǵan úkimet músheleri qatysty. Kelissózde ekonomıkalyq problemalar talqylandy.
"Biz birinshiden, eki jaqty ekonomıkalyq qarym-qatynasty talqyladyq. Olar eki eldiń shekara, transport, fıtosanıtarlyq jáne veterınarlyq baqylaý salalaryndaǵy ózar is-qımylyna qatysty. Sonymen qatar keden jáne salyq prosesin Eýrazıa ekonoıkalyq odaǵy (EAEO) men Dúnıejúzilik saýda uıymynyń (DSU) tıisti normalary men erejelerine saı basqarýǵa qatysty máseleler qaraldy" dedi Saǵyntaev.
Baqytjan Saǵyntaev kelissózde Qazaqstannyń keden organdary Qytaıdan taýar jetkizetin qyrǵyz tasymaldaýshylarynyń Qazaqstannan tranzıt arqyly ótken kedendik rásimdeýdi durys toltyrmaıtynyn anyqtap jatqanyn aıtty.
Kelissóz qorytyndysynda eki el premer-mınıstrleriniń birinshi orynbasarlary tóraǵalyq jasaıtyn jumysshy tobyn quryp, ol top bes jumys kúni ishinde birlesip jol kartasyn daıyndaýǵa sheshim qabyldanǵan. Taraptar jol kartasyn qabyldaǵan soń jasalǵan kelisimderdi tolyq oryndaýǵa mindettelmek.
Qyrǵyzstandaǵy saılaý aldynda jáne odan keıin eldiń prezıdenti Almazbek Atambaev qazaqstandyq áriptesi Nursultan Nazarbaevty synap, birneshe málimdeme jasaǵan. Mundaı narazylyqqa Nazarbaevtyń Qyrǵyzstandaǵy saılaý aldynda prezıdentikke kandıdattardyń birimen kezdeskeni sebep bolǵan. Budan soń Astana qazaq-qyrǵyz shekarasynan ótý tártibin qataıtyp, qyrǵyzstandyq áskerıdi tutqyndap, al Bishkek Talas sý qoımasynyń sýyn jiberetinin eskertken.
