Qazaqstan-Qyrǵyzstan shekarasynda tekserý jáne ótkizý beketinen azamattar men kólikterdiń ótýi áli qıyn. Qyrǵyzstan memlekettik shekara qyzmetiniń Azattyqtyń Qyrǵyz redaksıasyna habarlaýynsha, "Aq-Jol" jáne "Aq-Tilek" beketterinde kezek bar, "Chaldovar" jáne "Choń-Kapka" beketterinde kezek baıqalmaıdy,- dep jazady Qamshy.kz aqparat agenttigi.
Shekara qyzmetiniń ókili Salqyn Abdykarıevanyń sózinshe, "Aq-Jol" beketinde búgin saǵat 10-nan beri 300-deı adam jınalyp qalǵan. 15-20 mınýtta shekaradan 30 shaqty adamnan ótkizilip jatyr. Al jarty saǵatta 7-8 kólik qana ótkiziledi. Munda 40 shaqty jeńil kólik pen avtobýs tur. "Aq-Tilek" beketinde kezekte 400-den astam júk kólikteri tur. Qazaqstan shekarashylary saǵatyna 8 júk kóliginen ǵana ótkizip jatyr. Al "Chaldovar" jáne "Choń-Kapka" beketterinde kezek joq.
10 qazannan bastap Qazaqstan taraby qyrǵyz shekarasynan azamattar men kólikterdi ótkizý tártibin kúsheıtken. Sonyń saldarynan Qyrǵyzstannyń Chý jáne Talas oblystaryndaǵy baqylaý-ótkizý beketterinde adamdar men avtokólikter jınalyp, uzaq ýaqyt kezekte turýǵa májbúr bolǵan. Ásirese tez buzylatyn taǵam ónimderin tasıtyn úlken júk kólikteriniń júrgizýshileri qatty zıan shekken.
18 qazanda Astanada ótken kelissózder barysynda eki eldiń úkimet jetekshileri kelesi kúnnen bastap jolaýshy kólikteri men júgi bar adamdardy shekaradan ótkizýdi jeńildetý týraly ýaǵdalasqan. Keıinirek Qyrǵyzstan premer-mınıstriniń birinshi orynbasary Tolkýnbek Abdygýlov delegasıanyń bir bóligi kelissózderdi jalǵastyrý úshin Astanada qalǵany týraly habarlaǵan.
