Óskemendegi oblystyq Ana men bala ortalyǵynan dúnıege úshem ákelgen baqytty ana úsh arysymen birge úıge shyqty, dep Qamshy.kz aqparat agenttigi QazAqparatqa silteme jasap habarlaıdy.  

Aqarys, Janarys jáne Bekarys esimdi uldar 11 qazan kúni dúnıege kelgen. Olardy perzenthanadan shyǵaryp alýǵa týǵan-týystary, joldas-joralary jınaldy. Baqytty otbasy úılerine, ıaǵnı Kúrshim aýdanyndaǵy Saryóleńge attandy. Kúrshimdik Maıra men Ázimbektiń bul shaqalaqtardan bólek alty jáne úsh jastaǵy eki qyzy bar. Maıranyń aıtýynsha, óziniń jáne joldasynyń týǵandary arasynda egizder dúnıege kelgenimen, úshemder bolǵan emes. Úshemniń anasy pedagog bolsa, ákesi óz kásibimen aınalysady.   Náresteler ómirge kesar tiligimen kelgen, árqaısysynyń salmaǵy eki keliden artady. Denderi saý. Oblystyq ana men bala ortalyǵy dırektorynyń mindetin atqarýshy Qarlyǵash Majırınovanyń aıtýynsha, endi sábıler aýdandyq aýrýhana dárigerleriniń qamqorlyǵynda bolady. «Jyl saıyn bizde toǵyz myńdaı náreste ómir esigin ashady. Jyl basynan beri 81 egiz týdy. Sońǵy úsh jyl qatarynan dúnıege úshemder keldi. Olardyń barlyǵynyń densaýlyǵyn biz qatań baqylap otyramyz», - deıdi Qarlyǵash Majırınova. Kópbalaly otbasyna ana men bala ortalyǵynyń dárigerleri men medısınalyq qyzmetkerleri syı-sıapattaryn jasap, shyǵaryp saldy.