Almaty qalasynda Ómirbek Joldasbekov atyndaǵy stýdentter saraıynda Almaty qalasy Din isteri jónindegi basqarmasynyń qoldaýymen «Óner qyrandary» teatrynyń turǵyndar jáne jastar arasynda dinı teris aǵymdar ıdeıalarynyń taralýyn boldyrmaýǵa baǵyttalǵan «Zaman-aı 2» qoıylymy ótti, dep habarlaıdy Qamshy.kz aqparat agenttigi.
Qazirgi tańda destrýktıvti dinı aǵymdardyń terorıstik jáne ekstremıstik ıdeıalarynyń taralýy qoǵamda keńinen beleń alyp, búkil álem halqy úshin úlken qaýip tóndirýde. Olardyń negizgi kózdegen maqsaty memlekettiń qalyptasqan salt-dástúri men qundylyqtaryn ózgertý jáne turaqtylyǵyn buzý bolyp tabylady.
Uıymdastyrýshylardyń aıtýynsha, elimizde turǵyndar men jastardyń atalǵan destrýktıvti jat aǵymdardyń arbaýyna túsýiniń jáne qurbany bolýynyń aldyn alý maqsatynda kóptegen jumystar atqarylýda.
«Bizdiń búgingi tańdaǵy maqsatymyz – teatrlanǵan qoıylym arqyly jastarymyzdyń boıynda teris dinı aǵymdarǵa qarsy sezim, ıaǵnı ımýnıtet qalyptastyrý. Bul qoıylym da osy maqsatta uıymdastyrylyp otyr. Ótken jyly «Óner qyrandary» teatr ujymymen birlese otyryp «Zaman-aı» atty qoıylym jasap, kórermenge usynǵan bolatynbyz. Sol kórermenderdiń suraýy boıynsha biz bıyl taǵy da basqa senarımen qoıylym uıymdastyryp otyrmyz. Bul qoıylym eki kún, kúnine úsh retten tegin kórsetiledi.
Bul qoıylymǵa halyqty, ásirese stýdent jasardy kóptep shaqyryp otyrmyz. Óıtkeni senarı, negizinen, sol jastarǵa arnalǵan», - deıdi Almaty qalalyq Din ister jónindegi basqarmanyń basshysy Esenbekov Aıdar Raqymjanuly.
Onyń aıtýynsha, mundaı sharalardyń qoǵamǵa óte zor yqpal etedi.
«Ómirlik jaǵdaıdy sahnaǵa shyǵarý arqyly, sony somdaý arqyly jastardyń júregine jol taýyp, teris aǵymdardan aýlaq bolýǵa bir septigin tıgizedi dep oılaımyn. Sol úshin de bul isti qolǵa aldyq.
Búgingi tańda elimizdegi eń ózekti máselelerdiń biri – sol teris aǵym máselesi. Túrli túsiniksiz dinı ıdeologıalar jastardyń sanasyn jaýlap, olardy jaman áreketterge ıtermeleıdi, mundaı oqıǵalar kóptep bolyp ta jatyr. Osyndaı úlken jáne qaýipti dertiń aldyn alý úshin elimizde, qalamyzda keshendi jumystar kóptep júrip jatyr», - deıdi Aıdar Raqymjanuly.
Esterińizge sala ketsek, bul ıgi is-shara 2016 jyly bastaý alyp, basqarmanyń qoldaýymen «Óner qyrandary» teatrynyń «Zaman-aı» qoıylymy kópshiliktiń nazaryna usynylǵan bolatyn. Bul qoıylym – dinı ekstremızm men terorızmniń aldyn alýdaǵy mańyzdy is-sharalardyń biri boldy.
Atalmysh ıgi is-shara bıyl da óz jalǵasyn taýyp, «Zaman-aı 2» atty taqyryptyq qoıylymmen uıymdastyryldy. Jańa baǵdarlamada jastardyń ınternet, áleýmettik jelilerge táýeldi bolýy jáne dástúrli emes jat dinı aǵymdardyń aldyn alý jáne olardan saqtandyrý taqyrybynda qoǵamnyń rýhanıaty men tynyshtyǵyna keri áserin tıgizetin áleýmettik máseleler taqyryp etip alynǵan teatrlandyrylǵan qoıylymdar oryn aldy.
Aıta keter bolsaq, «Óner qyrandary» teatry ujymynyń «Zaman-aı 2» qoıylymy úsh bólimnen turady. Úsh bólimde úsh túrli ózekti máseleni qamtyǵan qoıylym bir balanyń ómirinde bolyp jatqan oqıǵalary jelisi boıynsha bir-birimen jalǵasady.
