Jeltoqsan aıynda birneshe merekeniń atap ótiletini belgili. Qazaqstan Respýblıkasy prezıdentiniń kúni – 1 jeltoqsan, QR Táýelsizdik kúni – 16 jeltoqsan, Qazaqstan Respýblıkasynyń Demokratıalyq jańarý kúni – 17 jeltoqsan, sondaı-aq Jańa jyl. Atalmysh merekelerge oraı Almaty ákimdigi tarapynan josparlanǵan daıyndyq barysyn bilý maqsatynda Qamshy.kz aqparat agenttiginiń tilshisi ákimdikke saýal joldaǵan edi.
Almaty ákimdigi baspasóz qyzmetiniń málimetinshe, merekelerdiń kún aralyǵy bir-birine jaqyn bolǵandyqtan, joǵaryda atalǵan merekelerdiń taqyryptaryn qamtıtyn qalany bezendirýdiń birikken tujyrymdamasy daıyndalady. Tujyrymdamada 1 jeltoqsannan bastalatyn bezendirý úshin ulttyq stıldiń elementteri paıdalanylmaq.
2017 jyly Almaty qalasynyń Mádenıet jáne muraǵattar basqarmasy jeltoqsan aıynyń barlyq merekelerine oraı qala bezendirý úshin jergilikti búdjetten 175 mıllıon teńge bólgen. Al 2016 jyly 215 mıllıon teńge bólindi.
QR Táýelsizdik kúni merekesi aıasynda Almaty qalasynda 2017 jyldyń 15 jeltoqsanynda Respýblıka saraıynda merekelik jıyn men kesh ótedi, sondaı-aq 16 jáne 17 jeltoqsanda «Táýelsizdik» monýmenti men «Táýelsizdik tańy» eskertkishterine gúl shoqtaryn qoıý sharasy ótedi. Osy maqsatta 2017 jyly 26 mıllıon teńge qarjy bólinedi, al 2016 jyly 31 mıllıon teńge bólingen.
Qala turǵyndary men qonaqtaryna Jańa jyldyq kóńil kúı syılaý maqsatynda aýdan ákimdikterine 429 mıllıon teńge qarjy bólindi. Bul qarjyǵa magıstraldi kóshelerdi ǵana emes, qalanyń 8 aýdanynyń kósheleri men kópirlerin jalpy uzyndyǵy 260 shaqyrym bolatyn grılándamen, ılúmınasıalarmen, 6800 dızaın elementterimen bezendiriledi, shaǵyn arhıtektýralyq nysandar men kornshteınder ornatylady.
Satyp alynǵan dızaın elementteri kelesi jyldarǵa da jaramdy ekenin eskertti. Iaǵnı, qarjy shamamen 10-15 jylǵa únemdeledi.
Al Jańa jylǵa daıyndyq QR Táýelsizdik kúninen soń biraq bastalady. Merekeniń basty shyrshasy 18 jeltoqsan kúni jaǵylady.
Sonymen qatar Almaty qalasy kásiporyndary arasynda Jańa jylǵa eń ádemi bezendirý nomınasıasy boıynsha baıqaý ótý josparlandy.
Sondaı-aq qala ákimdigi jyl saıyn turǵyndar tarapynan vandalızm faktilerine tap bolyp jatatynyn málim etti. Shyrsha oıynshyqtary urlanyp, shaǵyn arhıtektýralyq nysandar qıratylady. Ondaıda keıbir bezendirý sharalary sátsiz aıaqtalyp, jóndeý jumystaryna qaıta kirisýge týra kelip jatady.
