Qyrǵyzstan parlamentiniń depýtaty, prezıdenttikten burynǵy kandıdat Omýrbek Babanov ózine qozǵalǵan qylmystyq isti "saıası is" dep atady, dep habarlaıdy Qamshy.kz aqparat agenttigi Azattyq Radıosyna silteme jasap.

"Biz búgin quqyq qorǵaý organdary tarapynan bassyzdyq jasalǵanyn kórip otyrmyz. Olar saıası qylmystyq is qozǵap otyr. Bul bárimizge belgili" dedi Babanov.

Ol sonymen birge eldegi jaǵdaıǵa ózin kinálap, ázázil etip kórsetýdiń qajeti joq ekenin málimdedi. "Bılik problemanyń kózi Babanovta emes ekenin túsinbeıdi. Olar meni saıası alańnan alyp tastaǵanymen, problema sheshilmeıdi. Eldiń jaǵdaıy jaqsaryp ketpeıdi. Shyndyq báribir shyǵady" dedi ol.

4 qarashada Qyrǵyzstan bas prokýratýrasy Jogorký Keńesh depýtaty, prezıdenttik saılaýdan úmitker bolǵan Ómirbek Babanov pen basqa tulǵalarǵa qarsy Qyrǵyzstan qylmystyq kodeksi 297-babynyń 1-tarmaǵy (konstıtýsıalyq qurylymdy kúshpen ózgertýge shaqyrý) jáne 299-babynyń 1-tarmaǵy (ultaralyq, násildik jáne dinı arazdyqty qozdyrý) boıynsha qylmystyq is qozǵalǵanyn málimdegen.

Bul is Babanovtyń 28 qyrkúıekte saılaýaldy úgit-nasıhat naýqany kezinde Osh qalasynyń "Ámir Temir" shaǵyn aýdany turǵyndary aldynda sóılegen sózderine baılanysty qozǵalǵan.

Qyrǵyzstan bas prokýratýrasy "Tergeýge deıingi tekserý kezinde Jogorký Kenesh depýtaty O. Babanovtyń 2017 jyly 28 qyrkúıek kúni saılaýaldy naýqany barysynda Osh qalasy Ámir Temir aýdanynyń negizinen ulty ózbek turǵyndarymen kezdeskeni anyqtaldy. Babanov olardyń qoldaýyna ıe bolý maqsatynda kezdesýde etnıkalyq ózbekterdiń quqyǵy shekteletini, elde ulttar teńdigi joq ekeni, memlekettik organdar tarapynan ózbekterge qysym jasalatyny týraly pikirler aıtyp, mundaı jaǵdaıǵa belsendi túrde qarsylyq kórsetýge shaqyrǵan" dep habarlaǵan.

Omýrbek Babanovtyń ózi buǵan deıin álgi kezdesýde aıtqan sózderi burmalanǵanyn, elektrondyq BAQ betterinde taraǵan vıdeolardyń "montajdalǵanyn" málimdegen bolatyn.

"Respýblıka" partıasynyń ókilderi Omýrbek Babanovtyń qazir Reseıde emdelip jatqanyn aıtady. Onyń qashan elge oralatyny belgisiz.

Qyrǵyzstanda 15 qazanda ótken prezıdent saılaýy kezinde Ómirbek Babanov jeńiske jetken bılik partıasy atynan túsken Sooronbaı Jeenbekovtiń basty qarsylasy boldy.