Jańa maýsymda tyń jobalarmen kórermenderge jol tartqan «QAZAQSTAN» teleradıokorporasıasynyń SHQO boıynsha fılıaly endi jańa ataýmen shyqpaq. Búgin oblys turǵyndaryna rebrendıngten keıin jańarǵan «Altai’» telearnasy tanystyryldy,- dep habarlaıdy Qamshy.kz aqparat agenttigi. 

Saltanatty sharaǵa qatysqan SHQO ákiminiń birinshi orynbasary Nurymbet Saqtaǵanov telearna kórermenderi men ujymyna jańa maýsymda sáttilik tilep, lebizin bildirdi.

–  Elbasynyń «Bolashaqqa baǵdar: rýhanı jańǵyrý» maqalasyn nasıhattaý turǵysynan alǵanda bul – dál ýaqytynda jasalǵan qadam. «Qazaqstan» korporasıasynyń barlyq medıaresýrstardy bir logotıp aıasynda biriktirip, ataýlaryn biryńǵaı  latyn áripterimen tańbalaýy -  quptarlyq sheshim. «Qazaqstan-Óskemen» telearnasyn «Altaı» dep ózgertý oryndy. Óıtkeni, Altaı – túrki áleminiń altyn besigi. Shyǵys Qazaqstan – Kendi Altaıdyń, ór Altaıdyń júregi, – dedi Nurymbet Saqtaǵanov.

Aıta ketsek, jańa maýsymasharda «QAZAQSTAN» teleradıokorporasıasynda oryn alǵan rebrendıngten keıin birqatar telearnalardyń ataýy ózgertilip tanystyrylýda. Búgin «Altai’» telearnasy jetinshi bolyp jańa maýsymǵa aıaq basty.

Óskemen qalasynda 1958 jyly 16 naýryzda ashylǵan tuńǵysh televızıalyq stýdıa eńbek jolyn memlekettik saıasatpen tikeleı baılanystyrǵan. Jergilikti bıliktiń qoldaýymen shyǵysqazaqstandyqtar oblysta jáne elde bolyp jatqan sońǵy jańalyqtardan únemi habardar. Jańa maýsymda kógildir ekran arqyly kórermenderge jol tartqan jobalar qazirdiń ózinde aýdıtorıany baýrap úlgerýde.