Búgin jumys sapary barysynda Almaty ákimi Baýyrjan Baıbek qala búdjetiniń esebinen alynǵan komýnaldyq qyzmet pen İshki ister departamenti jańa arnaıy tehnıkalaryn qarap shyqty, dep habarlaıdy Qamshy.kz aqparat agenttigi Almaty qalasy ákimdiginiń baspasóz qyzmetine silteme jasap.

Megapolıs basshysyna qys kezinde qala kóshelerin tazalaıtyn arnaıy tehnıka da kórsetildi.

Bular KAMAZ shasıindegi quramaly 14 tazalaǵysh mashınalar, ótimdiligi joǵary Unimog úsh kópfýnksıonaldy tazalaǵysh kólik, eki Snowbooster qar tazalaıtyn mashınalar, konveıer-vakýýmdy Dulevo mashınasy, qar tazalaıtyn 16 Pony mashınasy, 20 mını traktorlar men mını tıegishter.

«Qalada jaıaý júrginshiler úshin jaqsy jaǵdaılar jasalýda, demek, qysta trotýarlardy tazalaýǵa erekshe mán beriledi. Qalanyń tarıhı ortalyǵynyń úshten biriniń jańarýyna oraı arnaıy tehnıkalar – kópfýnksıonaldy Pony mashınasy, mınıtıegishter, jeńil traktorlar alyndy. Jumysshylar aqaý keltirmeıtin quraldardy paıdalanatyn bolady», - dedi Tabıǵı resýrstar jáne tabıǵatty paıdalanýdy retteý basqarmasynyń basshysy Áset Masabaev.

Qalada tazalanatyn joldyń jalpy kólemi 20 mln. m². Qysta kóshe tazalaýmen 15 merdiger uıym, 1116 arnaıy tehnıka birligi aınalysady. Jol tazalaýmen aınalysatyn jumysshylar qataryn 1,2 den 2,7 myń adamǵa kóbeıtý qarastyrylǵan.

Bulardan ózge qala aýdandarynda óndiristik bazalar qurylǵan, sonyń arqasynda kóshe tazalaý jyldamdyǵy 1,5 esege artady. Jumysshylar dıslokasıasy janyna olardyń kıimderin aýystyrýǵa, ystyq sýsyndar iship, jylynýyna múmkindik beretin modýldi konteınerler qoıylady.

Jumys sapary barysynda megapolıs ákimi polısıanyń jańa avtokólikterin qarap shyǵyp, ishki ister organdarynyń materıaldyq-tehnıkalyq bazasyn jaqsartý qylmyspen kúreske jáne quqyqtyq tártipti kúsheıtýge oń yqpal etetinin atap ótti.

İİD-niń bastyǵy Serik Kúdebaev kóshelerge patrúl jasaý úshin otandyq ári gazben júretin 200-den astam jeńil avtokólik birligi alynǵandyǵyn jetkizdi. Bulardan ózge jeke quramdy tasymaldaıtyn eki avtobýs pen birneshe mıkroavtobýstar, eki órt avtosısternasy jáne 34 evakýator alynǵan. Onyń ústine, 147 avtomashına vıdeoregıstratorlarmen jabdyqtalǵan.

Aıta keterligi, Almatyda ótken jylmen salystyrǵanda bıyl quqyq qorǵaý organdaryn materıaldyq –tehnıkalyq jabdyqtaýǵa qarjy 2 ese kóp jumsalǵan. Eger 2016 jyly 706 mıllıon teńgege 118 jańa qyzmettik kólik alynsa, bıyl qala búdjeti esebinen 3,5 mlrd. teńgege túrli modeldegi 280 kólik alynǵan.