2017 jylǵy 6 qyrkúıekte Astana qalasyna memlekettik issaparmen Polsha prezıdenti Andjeı Dýda óziniń jubaıy Agata Kornhaýser-Dýdamen birge keldi. Polsha prezıdentiniń issapary «EKSPO-2017» halyqaralyq mamandandyrylǵan kórmesindegi Polsha aptalyǵyna arnaldy.
İssapar sheńberinde Polsha Respýblıkasy prezıdentiniń jubaıy Astana qalasyndaǵy №5 gımnazıada bolyp, ondaǵy polák jeksenbilik mektebiniń qyzmetimen jan-jaqty tanysty.
Jeksenbilik mekteptiń oqýshylary Polshanyń delegasıasy men joǵary mártebeli qonaqtaryn poláktiń ulttyq kostúminde qarsy alyp, olarǵa asa zor qurmet kórsetti. Sonymen birge, is-shara barysynda F. Shopen atyndaǵy polák kabınetiniń tusaýkeseri ótkizilip, polák jeskenbilik mektebiniń oqýshylarymen qyzǵylyqty áńgime ótkizildi. Agata Kornhaýser-Dýda hanymnyń mamandyǵy - muǵalim. Sondyqtan ol Qazaqstannyń bilim berý júıesine qyzyǵýshylyq bildirip, aqparat almasty.
№5 gımnazıasynyń dırektory A.S.Trýfanov, Astana qalasy «Rolasy» polák qoǵamynyń tóraǵasy E.A.Rogovskaıa men polák jeksenbilik mektebiniń dırektory M.V.Malınovskaıa polák jeksenbilik mektebiniń qyzmeti týraly jáne jalpy bilim salasyna qatysty máseleler týraly aıtyp berdi. «Bul jeksenbilik mektep Polshadan alys bolǵanymen, meniń júregimde jyly áser qaldyrdy. Meni qýantqany munda polák tilin poláktar ǵana emes, basqa da ult ókilderi oqyp jatyr eken», - dedi óz sózinde Agata Kornhaýser-Dýda hanym.
Polák jeksenbilik mektebi negizinen polák tilin, ádebıeti men fólkloryn oqytýǵa baǵyttalǵan. «Astana qalasyndaǵy 24 etnomádenı birlestiktiń janynda 12 jeksenbilik mektep jumys isteıdi, sonyń ishinde osy polák jeksenbilik mektebi Qazaqstan halqy Assambleıasynyń eń úzdik jeksenbilik mektebi retinde atalady. Bul mektepte jyl saıyn 50-den asa bala bilim alýda», - dedi mártebeli meımandarmen kezdesý barysynda Astana qalasy Qazaqstan halqy assambleıasy hatshylyǵynyń meńgerýshisi L.S. Qusaıynova.
Gımnazıanyń májilis zalynda ótkizilgen merekelik konsertte polák jáne qazaq tilderinde ánder shyrqalyp, ony oryndaǵan oqýshylar jurtshylyqtyń ystyq yqylasyna bólendi.
