Reseı prezıdenti Vladımır Pýtın men AQSH prezıdenti Donald Tramp Vetnamdaǵy samıtte kezdesti. Bul týraly Gazeta.rý jazady. Reseı delegasıasy Vetnamnyń Danang qalasyna kelmeı turyp, AQSH-tyń memlekettik hatshysy Reks Tılerson eki prezıdent arasyndaǵy kelissózder bolmaıtynyn aıtqan. Sonymen birge, amerıkalyq jaq bul kelissózder júrgiziletindeı talqylanatyn máselelerdiń de joqtyǵyn aıtty. Osydan keıin, reseılik delegasıa qatty tańyrqap qalǵan kórinedi. Sebebi, Tramptyń ózi dál osy kezdesýdi qalaǵan, tipti talqylanatyn máseleler taqyryptaryn da usynǵan.
Eki memleket basshylarynyń kezdesýi juma kúni tústen keıin bolýy kerek bolatyn.
Reseı prezıdentiniń baspasóz hatshysy Dmıtrıı Peskov «Ázirge eshteńe túsiniksiz. Amerıkalyq áriptesterimizden qaıshylyqty aqparat kelip jatyr»-dedi.
Al, áleýmettik jelide barlyǵy Tramptyń mundaı áreketin dórekilik dep baǵalaǵan.
Tipti Tramp Danangte Pýtınnen ádeıi qashqaqtap júrgendeı bolǵan. Samıt barysynda: «AQSH endi ereje buzýshylyq, ekonomıkalyq agresıa, urlyq sıaqty nárselerge kóz juma qaramaıdy»-dedi Tramp. Sodan keıin samıtti aıaqsyz qaldyryp shyǵyp ketken. Pýtınmen kezdesýge de, ASEAN blogyna kiretin memlekettermen kezdesýge de kelmeı qoıǵan. Buǵan árıne, reseılik dıplomattar qatty nalyp qalǵan.
Alaıda, kezdesýdiń sońǵy múmkindigi juma kúni bolǵan: Tramp óz ornynda otyrǵan Pýtınniń qasyna túk bolmaǵandaı kelip, qolyn alyp, arqasyn qaqqan. Vetnamnyń ulttyq kıimderin kıgen ekeýi qol alysyp sýretke túsken.
Fotosessıadan keıin, memleket lıderleri samıttiń saltanatty keshki asyna attanǵan. Arada biraz ýaqyt ótken soń, Tramp saltanatty keshki astan, Pýtınmen sol kúıi sóılespesten ketip qalǵan.
