Jýyrda «Enshi» zıatkerlik-tanymdyq televızıalyq jobasy kórermenge jol tartady. Jobaǵa 10-11 synyp oqýshylary men 1-2 kýrs stýdentteri qatysa alady. Baǵdarlama elimizdiń eń bilimdi jasyn anyqtaýǵa baǵyttalǵan. Bilim báıgesi QR Mádenıet jáne sport mınıstrligi Tilderdi damytý jáne qoǵamdyq-saıası jumys komıteti men Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń bastamasymen qolǵa alyndy. Tórt kezeńdi qamtıtyn saıysqa elimizdiń túkpir-túkpirinen 48 qatysýshy iriktelip alynady. Bilgirler básekesinde qoıylatyn suraqtardyń deni tarıh, mádenıet, ádebıet pen salt-dástúrge negizdelgen. Sondaı-aq, ıntellekt, logıka jáne myqty erýdısıa da óz septigin tıgizedi.
Sonymen irikteý Aqtaý qalasynda 18-qyrkúıekte bastaý alsa, Óskemende 19-y, Aqtóbe men Almatyda 21-i, Shymkentte 25-si, Astanada 29-y ótedi. Eki kezeńnen turatyn saıysta qatysýshylar úsh blogqa bólingen tapsyrmany oryndaıdy. Alǵashqy blogta berilgen 10 saýaldyń bir ǵana nusqasy durys bolsa, ekinshi blokta suraqtardyń birneshe jaýaby bolady. Al úshinshi blokta uzyn-sany jıyrma saýaldyń eshbir nusqasy usynylmastan, jazbasha túrde alynady. Testileýden joǵary upaı jınaǵandar ekinshi kezeńde baqtaryn synaıdy. Bul aınalymda qatysýshylarǵa aýyzsha túrli saýaldar qoıylady. Aımaqtyq kezeńge qatysa almaǵandar baǵdarlama saıtynda (www.yenshi.kz-avt.) ótinish qaldyrý múmkindigine ıe. Degenmen, tirkelý úshin de úmitkerlerdiń bilimi tekseriledi. Iaǵnı, ótinish qaldyrmas buryn qatysýshy 50 sekýnd ishinde 10 saýalǵa jaýap berýi tıis. Qoıylǵan suraqtardyń 9-yna durys jaýap bergen qatysýshyǵairikteý komısıasy 29-30 qyrkúıek aralyǵynda «Skype» arqyly baılanysqa shyǵyp, ekinshi kezeńniń suraqtaryna jaýap alady. Synnan súrinbeı ótkender ǵana jobanyń televızıalyq kezeńine joldama alady. Uıymdastyrýshylar saýaldardyń úzdiksiz ózgerip otyratynyn aıtady.
Aımaqtyq kezeńge barlyǵy 1500 úmitker qatysady dep josparlanǵan. Sondaı-aq, baǵdarlamada 1400 suraq oqylady dep kútilýde. Suraq demekshi, baǵdarlamada kórermender de saýaldaryn qatysýshylarǵa joldaýyna bolady.
- Baǵdarlamada qazaqtyń baıyrǵy salt-dástúri men ulttyq qundylyǵyn jańǵyrtý kózdelip otyr. Bul jobanyń burynǵy zıatkerlik-saıystardan ózgesheligi osynda. Iaǵnı, jeńimpaz tek bilimdi ǵana emes, salt-dástúrimizben sýsyndaǵan, qazaq tiliniń qadir-qasıetin sezine alatyn jas bolady,- dedi Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń PR-menedjeri Jazıra Ákimqyzy.
Dodada úzdikterden iriktelgen 48 oıynshy jobanyń alǵashqy aınalymynda 15 suraqqa jaýap beredi. Ekinshi «Toǵyz torap» kezeńinde, aty aıtyp turǵandaı 9 túrli taqyryp tóńireginde ózara synǵa túsedi. Al «Jamby atý» kezeńinde oıynshylar ózderi qalaǵan uıashyqqa jambyny ornalastyrý arqyly suraqty tańdaýǵa quqyly. Sońǵy aınalym tutastaı qazaqtyń shoqtyǵy bıik shyǵarmalary men olardyń avtorlary, salt-dástúrler, fólklordan keledi.
Saıys sońynda jeńimpazdar men júldegerlerdi qomaqty syıaqy kútedi.
Nurbaı SHÁKİM
