Taldyqorǵanda tolyq jóndelgen ortalyq saıabaq paıdalanýǵa berildi. Buǵan deıin saıabaqtyń jartysy jeke kásipkerdiń menshiginde bolatyn. Kásipker saıabaqtyń óz menshigindegi bóligin qaıtarymsyz negizde memleket menshigine berdi. Jańarǵan saıabaqtyń ashylý saltanatyna óńir basshysy Amandyq Batalov qatysty, dep habarlaıdy oblys ákiminiń baspasóz qyzmeti.

Balalardyń án-bıimen bastalǵan saıabaqtyń ashylýyn oblys basshysy A. Batalov óz quttyqtaýymen jalǵady:

«Buǵan deıin saıabaqtyń bir bóligi jekemenshiktiń qolynda bolǵandyqtan, saıabaqqa tolyqqandy jóndeý jumysyn júrgize almaǵan edik. Jer ýchaskesiniń ıesi, belgili kásipker, mesenat Baǵdat Manzorov saıabaqtyń ózine tıesili bóligin kópshiliktiń ıgiligi úshin memleketke qaıtaryp berdi. Endi balalarymyz jańarǵan saıabaqta emin-erkin oınaıtyn bolady. Biz óz tarapymyzdan saıabaqtyń jańǵyrtý jumystaryna, abattandyrý isine qajetti qarajat bóldik. Saıabaqtyń kelbeti túgeldeı ózgerdi, kórikti de qolaıly demalys ornyna aınaldy», - dedi oblys ákimi A. Batalov.

Qonaqtar abattandyrylǵan saıabaqtyń jumysymen tanysty. Murat Mutyrǵanovtyń sırk mektebiniń ónerpazdary túrli qyzyqty qoıylymdaryn usyndy. Oblys ákimimen birge aqsaqaldar, sportshylar men balalar saıabaq ishinde jas kóshetter otyrǵyzdy. Jalpy osy kúni saıabaq Polshadan ákelingen 50 túp qaıyń kóshetterimen tolyqty. Balalar demalys baǵyndaǵy 40 oryndyq júrdek poıyzǵa otyryp, túrli atraksıondarda oınady.

Ortalyq saıabaqtyń jańǵyrtylýy 2017 jyldyń naýryzynan qolǵa alyndy. Nysannyń jalpy smetalyq quny 345,9 mln teńge. Qurylys jumystaryn bas merdiger retinde  «Dostyq Astana NS» JSHS júrgizgen. Syrtqy jaryqtandyrylýy, jaıaý júrginshi joly, gúlzarlar men gazondar jasalyp, túrli aǵashtar otyrǵyzylǵan. Shaǵyn arhıtektýralyq formalar, músinder, oryndyqtar, balalar átkenshekteri, qorshaýlar, jáshikter ornatyldy. Sol sıaqty negizgi kire beris pen avtokólikterge arnalǵan oryn jasaldy.