Aqtaýdy Jańa jyldyq bezendirýge 13 mln teńgeden astam qarjy bólý josparlanýda. Bul týraly Lada.kz Aqtaý turǵyn úı-kommýnaldyq sharýashylyq bóliminiń basshysy Berik İzǵalıevke silteme jasap habarlady, dep jazady Qamshy.kz aqparat agenttigi. 

Merdiger kompanıany anyqtaý úshin konkýrs jarıalandy.  Konkýrsqa  2017 jylǵy 19 qarashaǵa deıin ótinishter qabyldanady. Berik İzǵalıevtiń aıtýynsha, jańa jyldyq bezendirýge aqtaýlyqtar Táýelsizdik kúninen keıin kirisedi. Konkýrs jeńimpazy jeltoqsannyń basynda anyqtalady. Osy maqsatta búdjetten 13 mıllıon 901 myń 785 teńge qarastyrylyp otyr. Tehnıkalyq sıpattamaǵa sáıkes, merdiger kompanıa 20 jeltoqsanda iske kirisip, úsh kún ishinde «Yntymaq» jáne «Astana» alańdaryn, sondaı-aq oblystyq ákimdik pen «Qazaqtelekom» ǵımaratynyń aldyndaǵy alańdy bezendirýi tıis.

12 metrlik eki shyrsha «Yntymaq» jáne «Astana» alańdaryna qoıylady. «Yntymaq» alańyndaǵy 714 metrge sozylyp jatqan butalar, 100 boz arsha jáne 326 túp aǵash  jaryq dıodty gırlándalarmen kómkeriledi. Oblystyq ákimdik pen «Qazaqtelekomnyń» mańyndaǵy jáne «Astana» alańyndaǵy butalar men aǵashtar da gırlándalarmen, kestelermen, jyltyraýyq shamdarmen bezendiriledi. «Astana» alańyndaǵy «Karavella» monýmenti 738 jaryq dıodty gırlándamen áshekeılenedi, sondaı-aq «Aqbota» parkin de jaryq dıodty shamdarmen bezendirý josparlanyp otyr.

Aıta ketsek, 2016 jyly Aqtaý Jańa jyldaǵy bezendirý jumystaryna 19 mıllıon teńge jumsaǵan bolatyn. Al 2015 jyly 49 mıllıon teńge jumsalǵan.