Qazaq ulttyq agrarlyq ýnıversıtetinde «Elbasy kitaphanasy» ortalyǵy ashyldy.
Jıynnyń ashylýynda sóz alǵan QazUAÝ rektory, akademık Tilektes Espolov ýnıversıtet bazasynda ashylǵan kitaphananyń mańyzdylyǵyna toqtaldy.
«Joba aıasynda biz ýnıversıtet bazasynda Elbasy kitaphanasyn ashyp otyrmyz. Basty maqsatymyz - Ult kóshbasshysy Nursultan Ábishuly Nazarbaevtyń ómiri men qyzmetin úlgi tutyp, jastardy lıderlik qasıetke tárbıelep, básekege qabiletti urpaq qalyptastyrý. Jaqynda ǵana biz Astanadaǵy Elbasy kitaphanasynan Prezıdentimizdiń 500 kitabyn aldyq. Bul - biz úshin, bizdiń belsendi jastarymyz úshin úlken olja. Bul kitaptar, bizdiń jastarymyzdyń rýhanı dúnıetanamyn keńeıtip, bilimderin tolyqtyra túsedi», - dedi JOO rektory.
Sondaı-aq, atalǵan JOO-da «Rýhanı jańǵyrý: jastar kózqarasy» halyqaralyq ǵylymı-tájirıbelik konferensıasy ótti. Konferensıada Almaty qalasynyń jáne sheteldik joǵary oqý oryndarynyń ǵalymdary, magıstranttary, stýdentteri baıandamalar jasady.
Jıynda «Tarıhı turǵydaǵy Qazaqstannyń jańǵyrý áleýeti», «Ulttyq kod rýhanı sanany jańǵyrtýdyń negizi retinde», «Qazaqstan jastarynyń rýhanı sanasyn jańǵyrtý sharttaryndaǵy tarıhı sana» taqyryptarynda baıandamalar jasaldy.
Almaty qalasynda Qazaqstan Respýblıkasynyń Tuńǵysh Prezıdenti - Elbasy kitaphanasy «N.Nazarbaev: dáýir, tulǵa, qoǵam» atty kóshpeli kórme jobasyn 10 qarashadan beri ótkizip keledi.
«N. Nazarbaev: dáýir, tulǵa, qoǵam» kóshpeli kórmesi tórt bólimnen turady:
«Kóshbasshy joly» bólimi QR Tuńǵysh Prezıdenti – Elbasy N. Á. Nazarbaevtyń ómir kezeńderinen syr shertedi. Ulttyq Kóshbasshymyzdyń joly rýhanı sananyń dáýiri men shyǵýy mazmunyn bildiretin tarıhı úderister men oqıǵalardy sıpattaý arqyly kórsetiledi. Qazaqstan Prezıdentiniń alǵashqy búkilhalyqtyq saılaýy elimizdiń Táýelsizdiginiń negizgi baǵyttaryn aıqyndaǵan basty tarıhı tańdaý boldy.
«Kóshbasshy fenomeni» bólimi Qazaqstan Respýblıkasynyń negizin qalaǵan, jahandyq keńistikte turaqtylyq pen qaýipsizdiktiń jańa ıdeıalaryn engizgen N. Á. Nazarbaevtyń memlekettik qurylym tujyrymdamasynyń qalyptasýy men damýy tarıhyna jeteleıdi. Kóshbasshy fenomeni Semeı ıadrolyq polıgonynyń jabylýynan bastap memleket astanasyn aýystyrý ıdeıasyn júzege asyrýǵa deıingi tarıhı mańyzy bar sheshimder men bastamalar arqyly kórinis tapqan.
«Elbasy mártebesi – el mártebesi» bóliminde Kóshbasshynyń jáne Qazaqstan halqynyń jahandyq úderisterdiń turaqtylyǵy men órkendeýine qosqan úlesin taný belgisi retinde usynylǵan Elbasynyń joǵary memlekettik nagradalary baıandalady.
«Álem qadirlegen Elbasy» bóliminde Qazaqstan Respýlıkasynyń qarqyndy syrtqy saıasaty kórsetiledi. Bul – álemdik deńgeıdegi saıasatker, Qazaqstan Respýblıkasynyń Tuńǵysh Prezıdenti N. Á. Nazarbaevtyń bıik bedeliniń nátıjesi. Elimizdiń kópvektorly syrtqy saıasaty dıplomatıalyq syılyqtar, jeke jazbalar, muraǵattyq materıaldar arqyly kórsetilgen. Árbir syı-sıapattan kez kelgen qaýip-qater men túsinbeýshilikten azat beıbit álemdi qalyptastyrýdaǵy N. Á. Nazarbaevtyń sińirgen eńbegin tanyǵan sheteldik memleket jáne úkimet basshylarynyń jeke qurmeti kórinedi.
Ekskýrsıalar balabaqsha tárbıelenýshileri, oqýshylar men stýdentter ispetti túrli jas sanatyndaǵy aýdıtorıa múshelerine arnalady.
Aıta keter bolsaq, 11 qarasha kúni QazUAÝ-da «Ǵylymı-bilim berý qyzmetindegi ınovasıalyq jumys túrleri» semınary, 13 qarashada «Qazaqstan joly: «Máńgilik El» semınar-trenıngi ótti.
