15 qarashada Qazaqstan Sýretshiler odaǵynyń basqarmasynyń tóraǵalyǵyna saılaý ótedi. 4 jylda bir keletin saılaýǵa baılanysty Qamshy.kz aqparat agenttiginiń tilshisi saılaýǵa qatysýshylardyń biri Almas Serikulymen suhbattasty.
Alǵashqy suraǵymdy sizdiń ótken ómirińizben, balalyq shaǵyńyzben baılanystyrǵym kelip otyr. Bala kezińizden sýretke qumar boldyńyz ba álde arman-maqsatyńyz múldem bólek boldy ma? Osy jaıly estelikterińizben bólisseńiz.
Men kishkene kezimnen beıneleý ónerine qumartyp, sol armanmen Abaı atyndaǵy QazUPÝ-dyń kórkem sýret fakúltetin 2009 jyly támamdap, sýretshi sheber boldym. 2011 jyly "Ǵalamart" shyǵarmashyl jastar klýbyn quryp, jumys jasadym. 2 jylda tórt kórme ótkizdik. Armanymyz qazaq jastaryn álemmen baılanysta jumys jasatý bolǵan. Ókinishke qaraı ol armanǵa qarjylyq kedergiler boldy. Biz qurǵan klýbta óz qarjysy bolmady, bolmasa da demeýshisiz jumys jasadyq. Kez kelgen jumys demeýshimen nemese óz qarajatyńmen iske asady. Sol sebepten bárin doǵaryp taza kásipkerlikke kettim. Óıtkeni kásip jasasaq máseleni eshkimniń kómeginsiz sheshe alatyn edik! Sol oımen áli kelemiz.
Ózińizdiń feısbýk paraqshańyzda «Sýretshiler odaǵyna alystan kelgenim joq, jeti jyl qoıan qoltyq aralastym, osyndaǵy máselelermen barynsha qanyqpyn», - dep jazypsyz. Eger saılaý kezinde jeńiske jetip, Sýretshiler odaǵy basqarmasynyń tóraǵasy bolyp taǵaıyndalsańyz eń aldymen qandaı ózgerister engizer edińiz? Kópshilik saılaý aldy ýádelerge ońaılyqpen sene qoımaıtynyn jaqsy biletin de shyǵarsyz. Saılaý aldy aıtqan sózderińiz bos sóz bolyp qalmaıdy ma?
Sýretshiler odaǵyna saılaýǵa túsý úshin eshkimge ýáde bermedim. Meniń eshqandaı ishki esebim joq. Meniń oıym qazirgi eski jumys isteı almaıtyn modeldi ózgertý. Meni qoldaıtyndar — jańalyq kútkender. Meniń oıym naryq zańdaryna saı. Ár sýretshi ózin qamtamassyz etetin qajetti bilim bersek sol eń úlken jeńis bolady.
Osydan biraz ýaqyt buryn saılaý aldynda úlken daý týyndaǵan edi. Jergilikti BAQ-tyń birinde «Basshylyqqa úmitker eki tulǵanyń arasyndaǵy «kresloǵa talas» qylqalam sheberlerin bir-birine aıdap salǵandaı. Aınaldyrǵan 30-40 sýretshi odaq ǵımaratyn basyna kóterdi» dep jarıalanǵan bolatyn. Osy týraly ne aıta alasyz?
Iá, sol daýǵa, bir birine jazylǵan aryzǵa yza bolǵan jas sýretshiler daýdy ózara talqylaǵan. Meni usynǵan da sol jas zamandas áriptesterim. Óıtkeni meniń oıym olarǵa unady. Shynaıy aqparat kimge bolsa da jaǵady.
Sol daýdan keıin birinshi xatshyǵa xabarlasyp ózderiniń atynan meniń de daýysqa túskenimdi qalady. Basynda qarsy bolǵam, keıinnen ózim kelisim berdim. Óıtkeni men de ózgeristi qalaımyn
Qazaqstandaǵy sýretshilerdiń alatyn róli qandaı? Sýret ónerimen qazir eshkimdi tańǵaldyra almaısyz degen pikirmen kelisesiz be?
Beıneleý óneri óz aldyna álemde materıaldyq qundylyq, shyndap qaraǵanda bul kez kelgen balamaly qundylyqtan joǵary. Altyn baǵasyn túsirýi múmkin, munaı, dollar bári qubylmaly. Al sýretshiniń ónimi tek baǵasy ósýmen bolady. Eshqashan qunyn joǵaltpaıdy
Siz bir sózińizde «Sýretshi óz bıiginde sýretshi bolý kerek», - depsiz. Siz óz bıigińizdi baǵyndyra aldyńyz ba? Sizdiń ózge sýretshilerdiń arasynda daralandyryp turatyn qandaı ereksheligińiz bar? Shyǵarmashylyǵyńyzdyń qandaı ózgesheligi bar?
Men ózim armandaǵan dodalar men shyńdarymdy ýaqytynan erte baǵyndyrdym, bári men úshin tek belester ekenine kózim jetti. Otyz jasqa deıin Qazaqstanda jas sheberler qatysatyn qandaı konkýrs bar, báriniń bas júldesin aldym. Shetelden de altyn alqa taqqan kezimiz boldy. Iaǵnı meni osy postta kórgisi keletin jastar meniń ómir jolyma qyzyǵady jáne durys sanaıdy. Áıtpese men de qatardaǵy qazaq azamatymyn. Bárinen talanttymyn dep aıta almaımyn. Oılaǵanymdy der kezinde júzege asyrýǵa talpynamyn, marketıń-menedjment týraly kóp izdenemin. Sýretshi óz bıiginde tursa olarda áleýmettik problemalar bolmaıdy. Ol úshin zamanaýı bilim kerek.
Suhbatyńyzǵa rahmet. Saılaýda sáttilik serigińiz bolsyn!
Suhbattasqan: Ásel Bolatqyzy
