Búgin Almaty qalasy «Qazaqstan baspasóz ortalyǵynda» «Alashorda» úkimetiniń qurylǵanyna 100 jyl tolýyna oraı uıymdastyrylǵan «Jylamasyn sábıler» atty qaıyrymdylyq konsertiniń baspasóz konferensıasy ótti, dep habarlaıdy Qamshy.kz aqparat agenttigi.

«Qazaqstan baspasóz ortalyǵynda» ótken bul sharaǵa Ushqyn Jamalbek, Áset Esjan syndy «Ugai production» ánshileri men Qamshy.kz aqparat agenttiginiń jetekshisi Bilál Qýanysh qatysty.

Búgingi baspasóz máslıhatynda atalmysh konsertke qandaı azamattar demeýshilik jasaýda? Konsertte óner kórsetetin estrada juldyzdary kimder? Syndy suraqtarǵa jaýap berip, 4 mıllıon teńge kómek beriletin 100 jetim bala men 100 stýdent qalaı tizimdelgeni jaıynda sóz boldy.

«Almaty qalasy ákimdiginiń qoldaýymen 24 qarashada Alataý dástúrli teatrynda «Jylamasyn sábıler» atty qaıyrymdylyq konsertin ótkizýdi josparlap otyrmyz. «Jylamasyn sábıler» atty qaıyrymdylyq konsertin ótkizýdegi basty maqsatymyz – 100 jetim bala men áleýmettik jaǵdaıy tómen 100 stýdentke árqaısyna 20 000 teńgeden jalpy quny 4 mıllıon teńgeni quraıtyn qarjylaı kómek kórsetý», - deıdi Qamshy.kz aqparat agenttiginiń jetekshisi Bilál Qýanysh.

Onyń aıtýynsha, bul konsert ózge konsertterden ózgerek.

«Jylamasyn sábıler» qaıyrymdylyq konsertiniń ózge konsertterden erekshe bolýynyń sebebi nede? Atalmysh konsertke bılet alǵan adam óziniń aqshasy qaı jetim balaǵa berildi nemese qandaı jaǵdaıy tómen stýdentke berildi – sony bile alady. Sonymen qatar, áleýmettik kómek alǵan stýdentter men jetim balalar ózderine kimniń kómekteskendigin biletin bolady», - deıdi Bilál Qýanysh.

Konferensıada sóz alǵan ánshi Ushqyn Jamalbek «Jylamasyn sábıler» «Ugai production»-nyń alǵashqy konserti ekenin aıtady.

«Ugai production»-nyń tyrnaq aldy konserti qaıyrymdylyq maqsatynda uıymdastyrylǵanyna qýanyshtymyz» - deıdi ánshi.

Esterińizge sala keteıik, «Alashorda» úkimetiniń qurylǵanyna 100 jyl tolýyna oraı 100 jetim bala men 100 muqtaj stýdentke 4 mıllıon teńge kómek beriletini habarlanǵan. Bul qarajat 24-shi qarashada ótetin «Jylamasyn sábıler» atty konsert bıletterin satý arqyly jınalmaq.

«Alash dep myń sóz sóılegennen góri, bir is jasaýdy maqsat tuttyq. Osy shara arqyly qazaqtyń 100 jetim balasy men 100 stýdentine Alash rýhyn sezindire alsaq maqsatymyzdyń oryndalǵany» - dedi Bilál Qýanysh.

Aıta keteıik, «Alashordanyń» 100 jyldyǵyna oraı jyl basynan beri 5 is-shara josparlanǵan. 5-shi naýryzda Álıhan Bókeıhannyń týǵan kúninde Baıtursynuly murajaı úıinde Alash arystarynyń rýhyna arnap as berilgen. Sáýirde Baıtursynuly saıabaǵyna 100 aǵash otyrǵyzyldy. 100 jetim bala men 100 muqtaj stýdentke kómek berý osy is-sharalardyń jalǵasy.