Búgin Almaty qalasy «Dostyk plaza» saýda jáne oıyn-saýyq ortalyǵynda «Memlekettik qyzmetter men bos jumys oryndarynyń jármeńkesi bolyp ótti, dep habarlaıdy Qamshy.kz aqparat agenttigi.

Sharany Almaty qalalyq Memlekettik qyzmet isteri jáne sybaılas jemqorlyqqa qarsy is-qımyl agenttigi men Medeý aýdandyq ákimdigi apparaty uıymdastyrdy.

Atalmysh jármeńkeni ótkizýdegi negizgi maqsat – halyqtyń memlekettik qyzmettiń kómegin alý kezindegi ádistemelik-túsindirý aýqymyn keńeıtý bolyp tabylady. Sonymen, qatar osyndaı sharalar arqyly memlekettik qyzmetterdi qoldaný aıasyn keńeıtýdi kózdep otyr. Jáne de halyqqa kórsetiletin memlekettik qyzmetterdi usyný tártibin jáne «Azamattarǵa arnalǵan úkimet» memlekettik korporasıasynyń «elektrondy úkimet» portaly arqyly kórsetiletin qyzmetter týraly keńinen túsindirý bolyp tabylady.

Búgin ótken memlekettik qyzmetter jármeńkesine Almaty qalasynyń jergilikti atqarýshy jáne aýmaqtyq organdardyń bilikti mamandary qatysty.

Memlekettik ister jáne sybaılas jemqorlyqqa qarsy is-qımyl agenttiginiń Almaty qalasy boıynsha departament basshysy Baıqanova Aıgúl atalmysh sharanyń negizgi maqsatyna toqtalyp ótti.

«Búginde biz memlekettik qyzmetter jármeńkesin tórtinshi ret ótkizip otyrmyz. Sonymen qatar, búgin memlekettik organdardaǵy os oryndar jármeńkesin qosyp uıymdastyrdyq. Mundaı sharalar qalanyń árbir aýdanynda ótkiziletin bolady. Atalmysh jármeńkeniń halyq úshin mańyzy zor jáne de búgingi tańda mundaı sharalardyń bedeli el arasynda kún sanap ósýde. Sebebi, eń alǵash ótkizilgen jármeńkege myńǵa jýyq adam kelgen bolsa, Túrksib aýdanynda ótken jármeńkege eki myńnan asa kelýshi ózderine qajetti keńes alǵan bolatyn. Al, Naýryzbaı aýdanynda uıymdastyrylǵan memlekettik qyzmetter jármeńkesine úsh jarym myńdaı adam kelgen bolatyn», - deıdi Baıqanova Aıgúl.

Onyń aıtýynsha, elektrondy úkimet qyzmetin qoldanýshylar jyl saıyn artyp keledi eken. Memlekettik qyzmetter jármeńkesin ótkizýdiń mańyzdylyǵyn atap ótken departament basshysy bul sharanyń halyqqa kóptegen paıdasyn tıgizetindigin aıtady.

Óz kásibin bastaǵysy kelip júrgen jastarǵa qol ushyn berýge daıyn «Damý» qorynyń ókili Ásem Ásetqyzy ózderiniń tıimdi jeńildikteri men sharttary jóninde aıtyp ótti.

Onyń aıtýynsha, qazirgi tańda jeke kásipti bastaý úshin múmkindikter kóp jáne sondaı múmkindikterdiń birshamasyn jastar «Damý» qorynan kepildikpen taba alady eken.

«Damý» qory – shaǵyn orta kásipke qarjylandyrý jaǵynan kómek kórsetetin qor bolyp tabylady. «Damý» qoryna qyzyǵýshylyǵyn bildirip kelip jatqandar kóp, olardyń basym bóligi jastar bolyp tabylady. Qazirgi tańda «Nátıjeli jumyspen qamtý jáne jappaı kásipkerlikpen damytý» degen baǵdarlamaǵa qyzyǵýshylyq tanytyp otyrǵandar kóp.

Bizdiń eń tıimdi jeńildikterimizdiń biri – paıyzdyq ústemesi, búgingi tańda Qazaqstan boıynsha eń tómen bolyp tabylady. Sonymen qatar, kez kelgen bank nesıe alǵan kezde kepilge qandaı da bir zat suraıdy, al kásibin endi bastap jatqan kásipkerlerge ol jetkiliksiz bolady, osyndaı jaǵdaıǵa arnalǵan bizdiń «Garantıa» degen kómegimiz bar.

«Damý» qorynda tegin oqýlar bar jáne de tolyqqandy keńes berý qyzmeti de tegin júrgiziledi jáne ózge de jeńildikteri óte kóp. Bizdiń bas keńsemizge kelgen adamǵa biz barlyǵyn egjeı-tegjeıli túsindirip, kásibin bastap, dóńgeletip alyp ketýge kóptegen jaǵdaılar jasaı alamyz», -  atalmysh qordyń ókili Ásem Ásetqyzy.

Aıta keter bolsaq, jármeńkege 23 memlekettik organ, 4 úkimettik emes uıym, «Atameken» UQK, «Damý» AQ ókilderi qatysty.

2359 adam memlekettik qyzmet týraly maǵlumat bilýge kelse, 350 adam bos oryndar jármeńkesine qatysty. Olardyń ishinde 56 adamdy Almaty qalalyq Jumyspen qamtý ortalyǵy jumysqa turǵyzý máselesin qarastyryp jatyr.

Endigi kezekte mundaı jármeńkelerdi Alataý jáne Jetisý aýdandarynda ótkizý josparlanýda.