Mańǵystaý óńirindegi oqý oryndary munaı salasynan tys mamandyqtarǵa da erekshe kóńil bólýde. Bul týraly búgin «Nur Otan» partıasy Tóraǵasynyń Birinshi orynbasary Muhtar Qul-Muhammedtiń Mańǵystaý oblysyna sapary barysynda belgili boldy, dep habarlaıdy Qamshy.kz aqparat agenttigi.

Sapar barysynda Muhtar Qul-Muhammed Aqtaý qalasyndaǵy Mańǵystaý polıtehnıkalyq kolejine arnaıy at basyn burdy. Qazirgi tańda bul bilim oshaǵy elimizdegi eń úzdik on arnaıy orta oqý oryndarynyń qatarynda. Munda dánekerleýshi, munaı jáne gaz ken oryndaryn paıdalanýǵa berý, tokar, metal óndeý sıaqty oblysta joǵary suranysqa ıe 20 mamandyq boıynsha mamandar daıarlaıdy. Sondaı-aq, óńirdiń munaı shıkizatyna táýeldiligin azaıtý maqsatynda kolejde aýyl sharýashylyǵy sıaqty oblysta kenjelep qalǵan salalar boıynsha da mamandar daıarlaý qolǵa alynyp, jańa on mamandyq ashylǵan.

Stýdentermen kezdesýinde Muhtar Qul-Muhammed Qazaqstandy Úshinshi jańǵyrtýǵa arnalǵan Elbasy tapsyrmalaryn oryndaýdyń mańyzyna toqtalyp, elimizdiń kemel keleshegi týraly aıtty. Sondaı-aq, ol Memleket basshysy júktegen mindetterdi júzege asyrýda óńirdiń belsendiligine nazar aýdardy. Sonyń ishinde kolejde dýaldi júıe boıynsha oqytý ádisiniń qolǵa alynýyn bereri mol bastama dep atap ótti. Osy rette kolejde Elbasy tapsyrmasymen júzege asyrylyp jatqan «Sátti qadam» partıalyq jobasymen oqyp júrgen jastar da az emes ekenin aıryqsha atap ótken jón.

Sonymen qatar Muhtar Qul-Muhammed memlekettik baǵdarlamalardyń nátıjesinde jemisti jumys istep turǵan «Kaspıı» sý tushshytý zaýyty men «Maǵash nan» nan ónimderi kombınatynda boldy. Aıta keteıik, tek «Nurly jol» baǵdarlamasy boıynsha 2017 jyly Mańǵystaý oblysyna 80 mıllıard teńge kóleminde qarajat bólindi. Sonyń nátıjesinde turǵyn úı-kommýnaldyq sharýashylyq nysandary jańǵyrtylyp, mektepter men balabaqshalar salynýda jáne óńirdiń kólik ınfraqurylymy da qarqyndy damyp keledi.

Sondaı-aq, partıa Tóraǵasynyń Birinshi orynbasary oblystaǵy joǵary oqý oryndary men arnaıy orta oqý oryndarynyń oqytýshylar quramymen jáne stýdentterimen kezdesti. Atalǵan is-sharada Muhtar Qul-Muhammed Elbasy aldymyzǵa qoıyp otyrǵan mindetterge toqtaldy. Sonyń ishinde qoǵamdyq sanany jańǵyrtýdyń mańyzy men mánine nazar aýdaryp, bul jolda Memleket basshysy jastarǵa zor senim artyp otyrǵanyn jetkizdi.

Partıanyń oblystyq aktıvimen kezdesýinde «Nur Otan» partıasy Tóraǵasynyń Birinshi orynbasary Elbasynyń partıa Saıası keńesiniń keńeıtilgen otyrysynda bergen tapsyrmalaryn júzege asyrý jóninde nurotandyqtardyń aldynda turǵan naqty mindetterdi atap ótti.