Tarazda ótken senbi kúni keshke úıinen shyǵyp ketken 10 jastaǵy bala sol kúıi qaıta oralmaǵan. Týystary men mektep ujymy ony jatpaı-turmaı izdegenimen nátıje bolmaǵan, dep habarlaıdy Qamshy.kz aqparat agenttigi "KTK" arnasyna silteme jasap.
Oqýshynyń óli denesin balabaqsha mańyndaǵy top aǵashtyń arasynan tártip saqshylary bir kúnnen keıin taýyp alǵan. Sol kúni Tarazda qar jaýǵan bolatyn. Sondyqtan balanyń máıiti taldyń japyraqtary men qarǵa kómilip qalypty. Al qaza tapqan 4 synyp oqýshysy munda óz aıaǵymen keldi me nemese álgi kúdikke ilinip jatqan 7 synyp oqýshysy kúshtep ákeldi me, ol jaǵy ázirge belgisiz.
Nıkıtanyń ata-anasy kameraǵa bet-júzderin kórsetkisi kelmeı, tek aqparat berýmen shekteldi. Aıtýlarynsha, ólgen balanyń denesinde soqqynyń izderi bar. Ári zorlanǵan bolýy múmkin. Ol bir úıdiń kenjesi. Al mektep dırektory "Nıkıta qaq-soǵy joq, tártibi túzý oqýshy",- deıdi.
"Qaıǵyly jaǵdaı bárimizdi eseńgiretip tastady. Ásirese, Nıkıtanyń synyptastaryna óte aýyr tıdi. Bulaı bolady dep kim oılaǵan. Qazir qaıtys bolǵan oqýshynyń ata-anasyna qoldan kelgen kómegimizidi berip jatyrmyz. Al ony óltirýi múmkin dep aıyptalyp jatqan oqýshymyz da buzaqylar tiziminde emes", - dedi mektep dırektory Lázzat Smanova.
Osy qylmysqa 7 synyp oqýshysynyń kúdikti dep tanylýy beker emes. Óıtkeni sol qaıǵyly oqıǵa bolǵan kúni onyń Nıkıtamen birge júrgenin kórgender bar. 14 jastaǵy jetkinshektiń júıke júıesinde aýytqý bar bolyp shyqty. Sondyqtan ol arnaıy korreksıalyq synypta oqyǵan. Qazir kúdikti oqýdan bosatylyp, úıinde jatyr. Al tártip saqshylary 10 jastaǵy bala "jelimniń ıisinen baqılyq bolǵan" deıdi.
"Tergeý jumystary nátıjesinde jábirlenýshiniń sol kúni 14 jastaǵy jasóspirimmen birge jelim ıiskegendigi anyqtaldy. Ólim sebepterin anyqtaý maqsatynda sot-medısınalyq saraptamasy taǵaıyndalyp, tergeý amaldary jalǵastyrylýda. Qazir kúdikti ata-anasynyń qaraýyna berý týraly bulttartpaý sharasy qoldanyldy, - dedi Jambyl oblystyq İİD-niń baspasóz hatshysy Gúlsara Muhtarqulova.
Eger bul jasóspirimniń qylmysy dáleldense, 10 jyldan 15 jylǵa deıin túrmege jabylýy múmkin. Al qaıǵyly oqıǵadan keıin qala mektepterinde tártip kúsheıtildi. Budan bylaı ata-analar ul-qyzdaryn ózderi ákelip, ózderi áketýleri tıis.
