AQSH prezıdenti Donald Tramp Soltústik Koreıany terorızmdi qoldaıtyn elder tizimine qosty. Sarapshylar AQSH Phenánǵa buǵan deıin-aq qatań sanksıalar salǵandyqtan bul sheshimdi sımvoldyq shara dep atady, dep Qamshy.kz aqparat agenttigi Azattyqqa silteme berip jazady. 

"Soltústik Koreıa rejımi zańǵa saı áreket etýi tıis. Ol zańǵa qaıshy ıadrolyq jáne zymyran baǵdarlamalaryn toqtatýy tıis. Ol halyqaralyq terorızmdi qoldaýyn doǵarsyn" dedi Tramp. AQSH prezıdenti Soltústik Koreıa basshysy Kım Chen Ynnyń baýyrynyń Malaızıada qaza tabýyn jáne Soltústik Koreıa túrmesinde 17 aı otyrǵan amerıkalyq stýdent Otto Ýormbırdiń qazasyn Phenánnyń zańsyz áreketterine mysal qyldy.

Soltústik Koreıany 2008 jyly sol kezdegi AQSH prezıdenti kishi Djordj Býsh Phenán óziniń ıadrolyq nysandaryna halyqaralyq ınspektorlardy kirgizýge kelisken soń terorızmdi qoldaıtyn elder tiziminen shyǵarǵan. Tramp Býshtiń ol sheshimin "ańǵyrtttyq jáne qatelik" dep atady.

Soltústik Koreıa sońǵy aılarda birneshe ret balıstıkalyq zymyran ushyryp, ıadrolyq synaq jasaǵan. BUU Qaýipsizdik keńesi buǵan jaýap retinde AQSH-tyń usynysymen Soltústik Koreıaǵa qarsy qosymsha sanksıalar salǵan.

AQSH memlekettik hatshysy Reks Tılersonnyń sózinshe, prezıdent Tramptyń sheshimi basqa elderge AQSH-tyń Soltústik Koreıa máselesine erekshe nazar aýdaryp otyrǵanyn uqtyrýy tıis.

Buǵan deıin terorızmdi qoldaıtyn elder tizimine Sırıa, Iran jáne Sýdan engizilgen.