Reseıdiń qorshaǵan ortaǵa baqylaý jasaý jáne gıdrometeorologıa federaldyq qyzmeti (Rosgıdromet) Reseı aýmaǵyndaǵy radıasıalyq ahýal týraly búleten jarıalady, dep Qamshy.kz aqparat agenttigi Azattyqqa silteme berip jazady.
Onda Chelábınsk oblysyndaǵy "Maıak" óndiris birlestigi aımaǵynan júz kılometr jerde alynǵan synamadan radıoaktıvti rýtenıı-106 (Ru-106) tirkelgeni aıtylǵan.
Buǵan deıin Fransıanyń ıadrolyq jáne radıasıalyq qaýipsizdik ınstıtýty (IRSN) Eýropa ústinen radıoaktıvti bultty anyqtaǵandaryn habarlaǵan. Instıtýt ǵalymdary rýtenıı-106 radıoaktıvti bulty Qazaqstannan ne Reseıden, anyǵyraq aıtqanda, Oral taýlarynyń ońtústigi men Chelábınsk oblysynan taraýy múmkin ekenin aıtqan.
Qazaqstandaǵy ıadrolyq jáne radıasıalyq qaýipsizdikke jáne ekologıaǵa qatysy bar mekemelerdiń ókilderi radıasıanyń Qazaqstannan taraǵanyn joqqa shyǵarǵan.
Reseı bıligi de Reseı terıtorıasynda qyrkúıekte radıoaktıvti nysandarda apat bolǵanyn nemese radıoaktıvti zat taralǵanyn joqqa shyǵarǵan bolatyn. Al "Rosatom" kompanıasy radıasıa óziniń kásipornynan shyǵyp jatyr degen tujyrymdy "negizsiz" dep ataǵan.
