20 qarashada, keshke Batys Qazaqstan oblysynyń (BQO) Bórili aýdany, Qyzyltal aýylyndaǵy №7 mektebinde 6-synyptyń 22 oqýshysy ýlanyp, aýdandyq aýrýhanaǵa tústi, dep Qamshy.kz aqparat agenttigi Azattyqqa súıene otyryp jazady. 

BQO densaýlyq saqtaý basqarmasynyń basshysy Qanat Tósekbaevtiń aıtýynsha, dárigerler zerthanalyq tekserý nátıjesi ázir daıyn bolmaǵandyqtan, oqýshylardyń neden ýlanǵanyn bile almaı otyr. Tósekbaevtiń sózinshe, oqýshylar ishi aýyryp, qusqan. Balalar mektep asqanasyndaǵy tamaqtan ýlanǵan bolýy múmkin ekenin aıtady.

Densaýlyq saqtaý basqarmasynyń bastyǵy 21 qarasha kúni tańerteń 17 bala jaǵdaıy jaqsaryp, aýrýhanadan shyǵarylǵanyn aıtady. Qalǵan bes bala aýrýhanada jatyr. Olardyń jaǵdaıy "qanaǵattanarlyq" dep baǵalanyp otyr.

Densaýlyq saqtaý basqarmasy "ınfeksıa qozdyrǵyshty" anyqtaıtyn saraptama nátıjelerin búgin tústen keıin jarıalaýǵa ýáde berdi.

BQO densaýlyq saqtaý basqarmasynyń málimetinshe, oblysta bıyl 10 aıda 228 adam jedel týyndaıtyn ishek ınfeksıasymen aýyrǵan.